Nýtt olíuævintýri mögulega í uppsiglingu í Danmörku

Fjallað er ítarlega um málið í Ekstra Bladet en þar kemur fram að hingað til hafi ekki fundist olía í vinnanlegu magni á þessu svæði. Það er hinsvegar stórt eða yfir 5.000 ferkílómetrar og Norðmennirnir eru jákvæðir. Þeir telja að þarna séu allt að 900 milljónir tunna af olíu undir hafsbotninum.

Rætt er við jarðfræðinginn Flemming Ole Rasmussen hjá danska umhverfisráðuneytinu sem segir að samkvæmt rannsóknum þeirra sé olíu og gas að finna á svæðinu en að ekki hafi enn fundist nægilega stórar olíulindir til að borgi sig að vinna þær. Mat Dana á magninu af olíu á þessu svæði liggur á milli 250 til 900 milljón tunna. Til samanburðar nema þekktar birgðir af óunnri olíu á umráðasvæði Dana í Norðursjó í kringum 200 milljónum tunna.

Sören Poulsen þróunarsjóri Noreco segir að sérfræðingar þeirra hafi farið í gegnum þau gögn sem liggja fyrir um svæðið og telja að samkvæmt þeim sé hægt að vinna allt að 900 milljónir tunna af olíu á því. Noreco er nú að undirbúa fyrstu tilraunboranir sínar og gefi þær góða raun er félagið tilbúið til að fjárfesta fyrir 5 milljarða danskra kr. eða yfir 100 miljarða kr. í frekari leit og vinnslu á svæðinu.

Ef þetta gengur allt eftir geta dönsk stjórnvöld andað léttar. Það liggur nefnilega fyrir að sökum þverrandi olíu á þeirra svæði í Norðursjó muni tekjur danska ríkisins af olíuvinnslunni þar minnka frá núverandi 23 milljörðum danskra króna og niður í 16 milljarða árið 2013. Þessum tekjumissi verður að óbreyttu að mæta með skattahækkunum á almenning eða frekari niðurskurði á fjárlögum danska ríkisins.