Japanir hætta að selja hundamat úr íslensku langreyðarkjöti

Japanskt fyrirtæki, Michinoku Farm, hefur hætt sölu á hundamat sem framleiddur var úr kjöti af íslenskum langreyðum. Þetta var gert í kjölfar mikils þrýstings frá fjórum stórum umhverfisverndarsamtökum, þar á meðal IKAN í Japan og Environmental Investigation Agency í Bretlandi.

Fjallað er um málið á vefsíðu Daily Mail. Þar er haft eftir Takuma Konno forstjóra Michinoku Farm að þessi ákvörðun hafi verið tekin þrátt fyrir að þessi hundamatur sé löglegur í Japan. Honum þykir miður að hafa neyðst til að hætta sölunni á þessum hundamat.  “Umhverfissinnar sjá hvali sem mikilvæg dýr en við tekjum hunda álíka mikilvæga,” segir Konno.

Nanamai Kurasawa forstjóri IKAN segir að þessi hundamatur hafi aðeins verið stöðutákn fyrir auðuga Japani. Því hafi verslanir verið með það á borðstólum til að lokka þessa viðskiptavini til sín.

Langreyðarkjötið var verkað eins og þurrkað nautakjöt (jerky) í hundamatinn og kílóið var selt á 50 pund ríflega 9.000 kr.

Fram kemur í fréttinni að Michinoku Farm framleiði m.a. hundamat úr kengúruhjörtum og lungum mongólskra hesta.