Formleg beiðni um endurupptöku á hinum svokölluðu Guðmundar- og Geirfinnsmálum verður lögð fyrir endurupptökunefnd á næstu dögum. Þetta staðfestir Ragnar Aðalsteinsson lögmaður í samtali við Vísi.
Beiðnin er lögð fram fyrir hönd Erlu Bolladóttur en hún var dæmd til fangelsisvistar ásamt nokkrum öðrum ungmennum árið 1980 fyrir morð á Guðmundi og Geirfinni sem hurfu báðir árið 1974.
Sem kunnugt er hvatti nefnd á vegum Ögmundar Jónassonar, þáverandi innanríkisráðherra, sem fjallaði um Guðmundar- og Geirfinnsmálin til þess að málin verði tekin upp að nýju. Niðurstöður nefndarinnar voru á einn veg; það væri hafið yfir allan skynsamlegan vafa að framburðir sakborninganna hafi verið ýmist óáreiðnalegir eða falskir.
Umræddur starfshópur var skipaður 7. október 2011 eftir mikla umfjöllun um Guðmundar- og Geirfinnsmálið á Stöð 2 og Vísi. Hópnum var falið að fara yfir rannsókn sakamálanna tveggja í heild sinni en sérstaklega þá þætti sem lutu að rannsókninni og framkvæmd hennar á sínum tíma. Starfshópnum var jafnframt falið að taka til athugunar þau gögn sem komið hafa fram á síðustu árum og að greina í skýrslu sinni frá því hvort og þá til hvaða ráðstafana þyrfti að grípa varðandi framhald málanna.
Eftir að endurupptökunefnd hefur tekið málið fyrir ratar það á borð ríkissaksóknara sem þá annað hvort fellst á að reka málið aftur fyrir Hæstarétti eður ei. Hæstiréttur hafnaði endurupptökubeiðni á málunum árið 1997 en Ragnar Aðalsteinsson telur að því verði öðruvísi farið nú, framfarir á sviði réttarrannsókna séu nú langt um áreiðanlegri en undir lok síðustu aldar. Þar vegi álit Gísla H. Guðjónssonar, prófessors í réttarsálfræði þungt en hann er af mörgum talinn einn fremsti fræðimaður á sínu sviði í heiminum. Hann hefur sérhæft sig í greiningu á áreiðanleika vitna og er það meðal annars álit hans að hin mikla einangrunarvist sem sakborningar málsins þurftu að sæta höfðu óneitanlega áhrif á geðheilsu þeirra – og þar með vitnisburð.
Ragnar segir að ekkert mál af þessari stærðargráðu hafi komið inn á borð til endurupptökunefndar. „Við erum að tala um gríðarlegt skjalamagn, þúsundir og aftur þúsundir blaðsíðna,“ segir Ragnar og er því ómögulegt að áætla hvenær vinnu nefndarinnar kunni að ljúka.
Vestri
KA
