Karlar í fjármálageiranum með 40 prósent hærri laun en konur

Launamunur kynjanna er 19 prósent í Bretlandi samkvæmt nýjustu tölum, launamunurinn er mestur í fjármála- og tryggingageirunum. Samkvæmt nýrri rannsókn sem Vinnumálastofnun Bretlands (UKCES) birti í dag er kynbundinn launamismunur í 90 prósent af starfsstéttum landsins. Munurinn sveiflast hins vegar töluvert milli starfsstétta.

Konur eru með allt að 40 prósent lægri laun en karlar í fjármála- og tryggingageirunum. Reglan virðist vera sú að því lægra hlutfall kvenna sem er í starfsstétt, því meiri launamunur er. Launamunur kynjanna er til dæmis mjög hár í orkuiðnaði, vísinda- og tæknigeirum. 

Konur eru hins vegar með hærri einkunnir en karlar í öllu námi, allt frá grunnskólagöngu í mastersnám.

David Cameron, forsætisráðherra Bretlands, tilkynnti í júlí að fyrirtæki sem eru með yfir 250 starfsmenn þurfa nú að birta laun eftir kynjum innan fyrirtækisins. Cameron færði rök fyrir því að þetta myndi draga úr kynbundnum launamismuni.