Umfjöllun, viðtöl og myndir: Valur - Stjarnan 29-31 | Stjarnan sótti sigur í Valshöllina

Stjarnan vann hörkusigur á Valsmönnum, 31-29, í Olís-deild karla í handknattleik í kvöld. Valsmenn voru lengi vel yfir í leiknum en gestirnir frá Garðabæ tóku leikinn yfir undir lokin og unnu sanngjarnan sigur.

Leikmenn Stjörnunnar áttu í raun flestir góðan leik og dreifðist markaskorið til að mynda töluvert. Ari Magnús Þorgeirsson var flottur í liði Stjörnunnar í kvöld og skoraði hann sjö mörk. Anton Rúnarsson var stórkostlegur hjá Val og gerði hann 12 mörk.

Af hverju vann Stjarnan?

Liðið var bara með mun meira bensín á tankinum undir lokin og keyrðu í raun yfir Valsmenn. Allir leikmenn liðsins komu við sögu í leiknum og því voru þeir einfaldlega orkumeiri og vildu þennan sigur meira. Það var eitthvað andleysi yfir Valsmönnum í síðari hálfleiknum. Stjörnumenn virðast vera að toppa á réttum tíma og er þetta fjórði sigurleikurinn í röð hjá liðinu.

Hverjir stóðu upp úr?

Ari Magnús er heldur betur að reynast Stjörnunni vel eftir áramót og hefur hann verið að blómstra. Sveinbjörn Pétursson var frábær í markinu undir lokin og komust Valsmenn illa framhjá honum. Anton Rúnarsson var langbesti leikmaður Vals í kvöld.

Hvað gekk illa?

Varnarleikur Valsmanna hrundi undir lokin og var allt of auðvelt fyrir Stjörnumenn að setja boltann í netið. Það er eitthvað sem Íslandsmeistararnir verða að skoða mjög vel. Stjörnumenn breyttu um vörn síðasta korterið og Valsmenn réðu bara ekki við það.

Hvað er framundan?

Stjarnan er komin í úrslitakeppnina og vilja væntanlega enda deildarkeppnina með stæl. Valsmenn vilja aftur á móti gera allt til þess að enda í topp fjórum og ná heimaleikjaréttinum í 8-liða úrslitunum.

Snorri: Kom algjört bakslag í okkar leik

„Við erum bara með ágætis tök á leiknum stóra hluta, en mér fannst við samt sem áður koma illa út í leikinn í síðari hálfleiknum,“ segir Snorri Steinn Guðjónsson, þjálfari Vals, eftir tapið.

„Við finnum engan takt varnarlega allan seinni hálfleikinn og svo þegar þeir breyta um vörn, þá kemur bakslag í okkar leik.“

Snorri segir að liðið hafi einfaldlega ekki verið nægilega gott í kvöld.

„Auðvitað lítur þetta þannig út að við höfum bara haldið að þetta væri komið. Deildin er bara svo svakalega jöfn og menn eiga ekki að leyfa sér að slaka á. Fyrst og fremst vorum við ekki nægilega góðir.“

Hann segir að liðið hafi leyst 3-2-1 vörn Stjörnunnar illa.

„Varnarlega erum við ekki góðir og við fáum á okkur 31 mark hér á heimavelli og það er eitthvað sem við viljum ekki.“

Einar: Ólýsanlega stoltur

„Það er margt sem við getum glaðst yfir í kvöld. Við vorum undir nánast allan leikinn en sýnum alveg rosalega mikinn karakter og vinnum frábæran sigur,“ segir Einar Jónsson, þjálfari Stjörnunnar, eftir sigurinn í kvöld.

„Við erum að vinna fjórða leikinn í röð og það var greinilega mjög gaman hjá okkur í kvöld. Við erum alltaf að klífa ofar og ofar og okkar leikur er að batna gríðarlega.“

Einar segir að Stjarnan sé að komast hægt og rólega yfir vegginn sem þeir hafa stefnt á allt tímabilið.

„Ég er hrikalega stoltur af strákunum og ég er ólýsanlega stoltur af þeim. Við breyttum um vörn í seinni hálfleik og þeir voru ekki að ráða við það. Svo held ég að við höfum haft meiri orku undir lokin. Ég held að allir mínir leikmenn hafi komið við sögu í leiknum og það sýnir mikinn styrk.“

Andri Marinó Karlsson, ljósmyndari Vísis, var á vellinum og tók meðfylgjandi myndir.