Göngumenn voru að fá sér morgunmat þegar fjallið byrjaði að gjósa

Göngumenn á fjallinu Merapi í Indónesíu voru að fá sér morgunmat í rólegheitunum þegar fjallið byrjaði að gjósa nú um helgina.

Eins og sést á meðfylgjandi myndbandi voru göngumennirnir skammt frá þeim stað fjallsins þar sem það byrjaði að spúa ösku og gufum upp í fimm kílómetra hæð en Merapi er þekkt eldfjall. Árið 2010 gaus fjallið og létust þá um 300 manns.

Í eldgosinu nú var íbúum sem búa í fimm kílómetra radíus við fjallið gert að yfirgefa heimili sín þegar eldgosið byrjaði.

Göngumennirnir sem voru að útbúa morgunmatinn á föstudag komust svo heilir á húfi niður af fjallinu, auk annarra göngumanna sem voru á Merapi en þeir voru alls um 120. Það var göngumönnunum til happs sem sjást í myndbandinu að vindur blés í suður burtu frá mönnunum.