Reyna áfram að komast til fótboltastrákanna

Tælenskir björgunarmenn leita enn að hópi unglinga sem talið er að séu fastir í helli í landinu.

Um er að ræða fótboltalið drengja á aldrinum ellefu til sextán ára sem fóru í hellakönnun ásamt þjálfara sínum, sem er tuttugu og fimm ára gamall.

Sjá einnig: Fótboltastrákar fastir í helli

Drengirnir eru tólf talsins og hefur ekkert til þeirra spurst síðan á sunnudag eftir að miklar rigningar urðu þess valdandi að tók að flæða inn í hellakerfið sem er stórt og mikið og nær langt ofan í iður jarðar.

Ættingjar drengjanna bíða nú milli vonar og ótta við hellismunann en varaforsætisráðherra landsins segist vona að þeir séu enn á lífi. Sérhæfðir kafarar frá hernum taka nú þátt í leitinni.