Þótt framkvæmdir ríkis og sveitarfélaga aukist úr 80 milljörðum upp í 130 milljarða króna milli ára er umfang framkvæmda núna minna en var á árunum fyrir hrun.
„Það eru minni umsvif núna í byggingariðnaði en var þá. Núna eru um 14 þúsund manns að vinna í byggingariðnaði en þegar mest lét árið 2008 voru þeir ríflega 16 þúsund. Svoleiðis að enn erum við ekki komin nálægt eða í sama fjölda og var,“ segir Sigurður Hannesson, framkvæmdastjóri Samtaka iðnaðarins.
„Við erum ekki að ná sömu tölum og var 2008, enda var það mikið framkvæmdaár. En í kjölfarið á því, eins og við vitum, var mikið dregið saman. En við erum að ná að breyta hallatölunni þannig að hún sé jákvæð hvað varðar fjármagn til framkvæmda,“ segir Óskar Örn Jónsson, forstöðumaður framkvæmdadeildar Vegagerðarinnar.
Framsögumenn á Útboðsþinginu töldu raunar orðið brýnt að styrkja innviði, sem lengi hafa beðið.
„Eins og átakið í malbiki er dæmi um. Svo erum við að byrja að hanna borgarlínu og gera marga þá hluti sem horfa mjög til framtíðar til þess að bæta samgöngurnar og innviðina í borginni,“ segir Dagur B. Eggertsson, borgarstjóri.
„Það eru til dæmis þrjár hugmyndasamkeppnir, eða framkvæmdasamkeppnir, vegna hjúkrunarheimila á árinu, því það er náttúrlega verið að gefa í uppbyggingu þar,“ segir Guðrún Ingvarsdóttir, forstjóri Framkvæmdasýslu ríkisins.
Og framkvæmdir eru ekki bara á Reykjavíkursvæðinu.
„Þetta er um allt land. Það er líka heilmikið um standsetningu á eldri mannvirkjum, bæði auðvitað hér á höfuðborgarsvæðinu en víða um land. Þannig að þetta er bara mjög dreift,“ segir Guðrún.
„Það er ekki bara góður tími heldur er það líka nauðsynlegt. Vegna þess, eins og við höfum bent á, þá hefur viðhaldi og uppbyggingu innviða verið heldur minna sinnt en skyldi á síðustu árum. Svoleiðis að núna er röðin komin að innviðunum enda eru innviðirnir lífæðar samfélagsins,“ segir Sigurður Hannesson, framkvæmdastjóri Samtaka iðnaðarins.
Hér má sjá frétt Stöðvar 2:
