Einn lést í þyrluslysinu í New York

Flugmaður að nafni Tim McCormack lést í gærkvöldi þegar þyrla brotlenti á skýjakljúfi í New York. Þetta kemur fram í frétt breska ríkisútvarpsins BBC en McCormack var jafnframt einn um borð í þyrlunni.

Vísir greindi frá því í gærkvöldi að þyrla hefði brotlent á þaki 54 hæða skýjakljúfs á sjötta tímanum. AXA Equitable turninn stendur við 7. breiðgötu í Manhattan skammt frá Times Square.

Eldur kom upp í byggingunni þegar þyrlan brotlenti en slökkviliðsmenn borgarinnar höfðu hraðar hendur og náðu að ráða niðurlögum eldsins. Engin slys urðu á fólki í byggingunni.

Borgarbúar enn að jafna sig eftir 11. september

Andrew Cuomo, ríkisstjóri New York, segir að borgarbúar í New York séu með vott af áfallastreituröskun eftir árásina á tvíburaturnanna þann 11. september 2001 og því væri ekkert nema eðlilegt að þeim hefði brugðið mjög þegar fréttir að þyrluslysinu tóku að spyrjast út.

Cuomo segir að það sé mjög eðlilegt að borgarbúar, líkt og hann sjálfur, hefðu í fyrstu búist við því versta og jafnvel óttast að um hryðjuverk væri að ræða. Cuomo tekur það þó skýrt fram að það hafi ekki verið neitt sem benti til þess að um viljaverk væri að ræða.

James O‘Neill, sem fer fyrir rannsóknarnefnd samgönguslysa, sagði á blaðamannafundi að veðurskilyrði hefðu verið afar slæm en rigning og mikil þoka var yfir borginni. O‘Neill sagði að það væri sannarlega mjög óvanalegt að þyrla brotlenti á skýjakljúf en rannsókn þyrluslyssins heldur áfram.