Martin og félagar í draumastöðu eftir fyrri úrslitaleikinn | Sjáðu helstu tilþrif Martins

Martin Hermannsson og félagar í Alba Berlín eru komnir í góða stöðu til að tryggja sér þýska meistaratitilinn í körfubolta. Þeir unnu 23 stiga sigur á Ludwigsburg í fyrri leiknum af tveimur í úrslitaeinvígi þýsku deildarinnar.

Martin skoraði 14 stig í leiknum, gaf sex stoðsendingar, tók tvö fráköst og stal einum bolta. Hann var stigahæstur í liði Alba Berlín ásamt Rokas Giedraitis og stoðsendingahæstur. 

Lokatölur urðu 88-65 fyrir Alba, sem unnu alla leikhlutana nema þann síðasta. Þeir eru því í ansi góðum málum fyrir seinni leikinn sem fer fram á sunnudag, en til að tryggja sér titilinn þurfa þeir að tapa með minna en 23 stigum eða einfaldlega vinna leikinn. 

Helstu tilþrif Martins má sjá í spilaranum efst í fréttinni.