Jón Axel Guðmundsson og félagar í Davidson þurftu að sætta sig við tap á móti George Washington eftir fjórframlengdan leik í bandaríska háskólaboltanum í nótt.
Jón Axel spilaði í 58 mínútur af 60 mögulegum í þessum ótrúlega leik. Hann spilaði mest allra í sínu liði.
Venjulegur leiktími er 40 mínútur og spilaði Jón Axel því næstum því einn og hálfan leik.
Tonight’s @OrthoCarolina final score from D.C. pic.twitter.com/UW6SpP76l8
— Davidson Basketball (@DavidsonMBB) January 30, 2020
Jón Axel var með 31 stig, 10 fráköst og 6 stoðsendingar í leiknum. Hann tók 29 skot utan af velli og hitti úr 11 þeirra. Jón setti einnig niður 6 af 11 vítum.
Jón Axel var efstur í sínu liði í stigum, fráköstum og stoðsendingum en hann tók líka flest skot og fékk flest víti.
Jón Axel spilaði allar 20 mínúturnar í boði í framlengingunum fjórum og var með 10 stig og 2 fráköst á þeim. Hann kom Davidson yfir í bæði fyrstu og annarri framlengingu en George Washington tókst að tryggja sér aðra framlengingu í bæði skiptin.
Davidson var búið að vinna þrjá leiki í röð fyrir leikinn í nótt en Jón Axel hefur nú skorað 20 stig eða meira í fjórum síðustu leikjum liðsins.
