Elvar Örn öflugur í þriðja sigri Skjern í röð

Skjern er á fljúgandi ferð í dönsku úrvalsdeildinni í handbolta. Liðið vann sinn þriðja leik í röð í dag er það heimsótti Ringsted. Þriggja marka sigur staðreynd, 22-19. Elvar Örn Jónsson átti góðan leik í liði Skjern.

Elvar Örn skoraði fjögur mörk í dag ásamt því að vera með skráðar tvær stoðsendingar í sigri dagsins. Elvar heldur áfram að gera gæfumuninn hjá Skjern sem er á frábæru skriði í deildinni. 

Eftir töp í fyrstu fjórum leikjum liðsins í deildinni hefur það unnið fjóra og gert eitt jafntefli. 

Sigurdagsins á Ringsted, 22-19, þýðir að liðið er komið upp í 8. sæti með níu stig. Aðeins eru tvö stig í GOG sem situr í 2. sæti með 11 stig. Álaborg er hins vegar með fullt hús stiga á toppnum eða 14 stig eftir sjö umferðir.