CCP náði í fyrstu atrennu og fleiri íslensk fyrirtæki hafa áhuga

„Vottunin hefur mikla þýðingu fyrir CCP. Við erum að keppa um mjög eftirsótta starfskrafta innan leikjaiðnaðarins á alþjóðavísu. Til að mynda eru um 35% starfsmanna á Íslandi erlendir ríkisborgarar sem hafa flust til landsins til að starfa fyrir CCP, vegna þess að við eigum hreinlega ekki til þá sérþekkingu og færni í leikjagerð hérlendis,“ segir Erna Arnadóttir VP of People hjá CCP en nýverið hlaut fyrirtækið vottunina Great Place to Work (GPTW). 

GPW er alþjóðleg stofnun um vinnustaðamenningu. Með vottuninni frá GTPW skipar CCP sér nú í hóp alþjóðlegra fyrirtækja eins og DHL, Cisco, Hilton og Adobe.

Erna segist vita til þess að önnur íslensk fyrirtæki hafi áhuga á vottuninni. CCP hafi nú þegar fengið fyrirspurnir frá íslenskum fyrirtækjum sem eru að íhuga þessa vottunarleið og vilja nýta sér reynslu CCP.

Náðu í fyrstu atrennu

Að sögn Ernu var ferlið nokkuð langt og strangt. CCP hafi þó náð í gegn í fyrstu atrennu, sem þeim skilst að sé afar sjaldgæft.

„Ferlið byrjar á því að við skilum af okkur ýmiss konar ítarlegum upplýsingum um innviði og menningu CCP á tölulegu og rituðu formi. Við þurftum að leggja í töluverða vinnu við að finna þær upplýsingar og skila réttum upplýsingum, sem lágu ekki alltaf fyrir,“ segir Erna.

Þá segir hún að skila hafi þurft inn ýmsum upplýsingum. Til dæmis fjárhagslega lykilmælikvarða, lýðfræðilegar upplýsingar um starfsmannahópinn, samsetningu teymisins og fjölbreytileika. Þá voru atriði eins og fjarverur frá vinnu, starfsmannavelta, aðferðir við ráðningar, starfsþróun, þjálfun, starfsmannakostnaður og jafnvægi einkalífs og vinnu skoðuð og metin.

Síðan var gerð var ítarleg spurningalistakönnun meðal starfsmanna þar sem spurt var um fimm lykilþemu sem mynda svokallaða GPTW trausts vísitölu. Spurt er um upplifun starfsmanna af stjórnunarháttum og trúverðugleika stjórnenda, virðingu sem þeir upplifa í samskiptum og samvinnu, og hvort þeir upplifi sanngirni og heiðarleika á vinnustaðnum,“ 

segir Erna.

Það sem myndar GPTW traust vísitöluna er trúverðugleiki stjórnenda, virðing og sanngirni. Þá segir Erna að spurt hafi verið út í stolt og tækifæri starfsmanna til að hafa áhrif innan fyrirtækisins sem og samstarf og samvinnu, félagsleg tengsl og stuðning innan vinnustaðarins. „Great Place to Work metur síðan niðurstöðu spurningalistakönnunarinnar og upplýsingarnar sem við gáfum í upphafi þegar ákveðið er hvort þeir votta okkur sem frábæran vinnustað,“ segir Erna.

Reykjavík, London, Shanghai

„Vottun þriðja aðila hefur því mikla þýðingu fyrir okkur þegar við erum að ráða til okkar nýtt fólk. Við erum afar stolt af því að hafa fengið vottun fyrir allar skrifstofur okkar, í Reykjavík, London og í Shanghai. Það er ekki sjálfgefið að ná því í fyrstu atrennu er okkur sagt,“ segir Erna.

Hún segir vottun sem þessa gera CCP kleift að komast í viðmiðunarhóp tíu bestu tæknifyrirtækja á hverju svæði. CCP standist allar samanburðarkröfur.

Með því að vinna með niðurstöðurnar að úrbótum þar sem þeirra er þörf í því skyni að gera góðan vinnustað betri þá munum við ná langt. Hver veit nema við komumst á árlegan lista Forbes yfir 100 bestu fyrirtæki í heiminum. Það væri eitthvað,“ 

segir Erna.