Norska lögreglan skaut mann til bana

Atvikið er sagt hafa átt sér stað í hverfinu Valaskildi í Sarpsborg um klukkan átta í morgun að norskum tíma. Norska ríkisútvarpið segir að lögregla hafi lokað vegum og götum í kringum vettvang. Maðurinn sem var skotinn hafi legið á gangstétt fyrir utan veitingastað.

Lögreglan staðfestir aðeins að maður hafi verið skotinn í aðgerð hennar. Maðurinn sé látinn. Engar frekari upplýsingar hafa verið gefnar um manninn eða hvort hann hafi verið vopnaður.

Íbúar í hverfinu segjast hafa heyrt að minnsta kosti fjóra byssuhvelli. Þeir hafi síðan séð sjúkraliða reyna að endurlífga manninn þar em hann lá í jörðinni.