Segja eðlilegt að gagnsóknin gangi hægt: „Það liggur ekkert á“

Í stað þess að ráðast beint á víggirta varnarlínu Rússa vilji Úkraínumenn þess í stað beita Rússa í Kherson auknum þrýstingi á víglínunni, samhliða því að nota stórskotalið og eldflaugar til að grafa undan birgðaneti þeirra og einangra rússneska hermenn vestan við Dnipro-ána.

Úkraínumenn hafa skemmt eða eyðilagt allar brýr yfir ána og gera árásir á ferjur Rússa og flotbrýr sem þeir reyna að gera yfir ána.

Sérfræðingar segja milli fimmtán og 25 þúsund rússneska hermenn vera vestanmegin við ána en Wall Street Journal, (áskriftarvefur) segir að takist Úkraínumönnum að einangra hermennina væri mögulegt að þvinga þá til að gefast upp eða flýja. Úkraínumenn vilji ekki þurfa að taka Kherson-borg með því berjast um hana, götu fyrir götu, hús fyrir hús.

Slíkt myndi kosta mörg mannslíf og valda mikilli eyðileggingu.

„Það liggur ekkert á,“ segir Oleksiy Arestovych, ráðgjafi forseta Úkraínu við WSJ.

Sjá einnig: Plata Rússa til að skjóta dýrum eldflaugum á gervi-HIMARS

Ráðamenn í Kænugarði verjast allra fregna af gagnsókninni en fregnir hafa þó borist af því að her Úkraínu hafi sótt fram gegn Rússum á nokkrum stöðum í Kherson og hefur það verið stutt af myndböndum sem hermenn hafa birt á samfélagsmiðlum.

Yfirburðir Rússa þegar kemur að stórskotaliði eru enn miklir og Kherson er mjög flatt hérað. Lítið er um skjól fyrir bæði Úkraínumenn og Rússa, að skotgröfum undanskildum. Það felur í sér að Úkraínumenn eru auðveld skotmörk fyrir rússneskt stórskotalið en nái úkraínskir hermenn að reka Rússa úr skotgröfum sínum, snýst taflið við. Þá eru rússneskir hermenn auðveld skotmörk fyrir úkraínskt stórskotalið.

Sérfræðingar bandarísku hugveitunnar Institute for the study of war segja ummæli viðmælenda WSJ styðja greiningu þeirra um að gagnsókn Úkraínumanna muni ekki skila umtalsverðum árangri á skömmum tíma. Hún snúist meira um það að draga úr getu rússneska hersins en að hernema stór landsvæði.