Maguire fékk vikufrí | Leikmannahópur United ósáttur

Maguire var ekki í leikmannahóp United í síðustu leikjum liðsins gegn Omonia í Evrópudeildinni og Manchester City í ensku úrvalsdeildinni vegna meiðsla í læri. 

Erik ten Hag leyfði fyrirliðanum að fá vikufrí í Portúgal til að hreinsa hugann á meðan hann jafnar sig á meiðslunum. 

Aðrir leikmenn United eru ekki svo hrifnir af því að Maguire hafi fengið frí en knattspyrnustjórinn Erik ten Hag hefur verið harður í horn að taka varðandi agavandamál hjá Manchester United. Knattspyrnustjórinn hafði áður gefið út að allir leikmenn, meiddir eða ekki, yrðu að vera í kringum liðið á æfingasvæðinu. 

„Í tilviki Harry eru aðrar aðstæður að baki. Knattspyrnustjórinn vildi að hann fengi andlegt frí til þess að eiga betur við þá pressu sem leikmaðurinn [Maguire] er undir,“ sagði heimildarmaður The Sun. 

Manchester United mætir Everton í ensku úrvalsdeildinni klukkan 18.00 í dag en Maguire mun ekki taka þátt í leiknum vegna áðurnefndra meiðsla í læri.