„Höfum aldrei nálgast leik þannig“

Sindri Sverrisson skrifar 11. október 2022 12:30

Íslenska landsliðið var í nauðvörn í fyrri hálfleik gegn Hollandi í síðasta mánuði, þar sem HM-sæti var í boði. Sandra Sigurðardóttir kom ítrekað til bjargar og átti algjöran stórleik en niðurstaðan varð því miður 1-0 sigur Hollands með marki í uppbótartíma. Getty

Landsliðsþjálfarinn Þorsteinn Halldórsson og hans teymi telja sig hafa fundið leiðir til að sækja í gegnum portúgalska liðið í dag. Þorsteinn hefur engan áhuga á því að liggja í vörn allan leikinn.

Fyrir mánuði síðan átti Ísland möguleika á að tryggja sig inn á HM en tapaði þá 1-0 gegn Hollandi. Í dag gefst nýtt tækifæri, síðasti séns, með sigri gegn Portúgal í umspilsleik í Pacos de Ferreira.

Í leiknum við Holland, reyndar gegn umtalsvert sterkari mótherja en Portúgal, virtist spennan hreinlega bera íslenska liðið ofurliði í fyrri hálfleik. Þorsteinn segir það þó ekki ástæðuna fyrir tapinu þá og er með lausnir gegn Portúgal:

„Þá verðum við ekki í vandræðum“

„Við höfum alveg unnið í því líka hvernig við nálgumst leikinn út frá því að spennustigið sé sem best. En það voru bara ákveðnir hlutir sem gengu ekki upp, í seinni hluta fyrri hálfleiks gegn Hollandi.

Við höfum farið yfir hvernig við ætlum að spila á móti Portúgal og ef það sem við leggjum upp með gengur upp, og við þorum að vera með boltann og spila í gegnum pressuna þeirra á ákveðinn hátt, þá verðum við ekki í vandræðum. Við eigum von á því að ef þær spila eins og gegn Belgíu [í 2-1 sigrinum síðasta fimmtudag] þá séu þarna leiðir til að fara í gegnum þær, búa til færi og skapa mörk,“ segir Þorsteinn.

Klippa: Þorsteinn um hvernig Ísland mun spila gegn Portúgal

Ekkert má út af bregða gegn Portúgal í dag en Þorsteinn segir að íslenska liðið muni ekki spila varnarsinnaðri leik en það sé vant.

„Í sjálfu sér höfum við aldrei nálgast leik þannig að við ætluðum að liggja til baka. Byrja varnarleikinn fyrir aftan miðlínu eða eitthvað slíkt. Við höfum aldrei farið í leik á þann hátt. Stundum þróast leikir þannig, og það er bara partur af fótbolta að stundum lenda lið í því að andstæðingurinn ýti þeim aftar á völlinn.

Það geta öll lið lent í þessu. Við sáum þetta í enska boltanum um helgina. Milljarðaleikmenn sem þurftu allt í einu að standa aftan á vítateig. Stundum ganga hlutirnir þannig að þú þarft bara að verjast og þá þarftu bara að gera það vel. Ef þú gerir það þá koma tækifæri til að fara framar á völlinn. Við þurfum að vera tilbúin í alla þætti leiksins,“ segir Þorsteinn.

Ísland og Portúgal mætast klukkan 17, að íslenskum tíma, í úrslitaleik um sæti á HM. Fjallað verður ítarlega um leikinn á Vísi í allan dag.

HM 2023 í Ástralíu og Nýja-Sjálandi Fótbolti Landslið kvenna í fótbolta

Tengdar fréttir

Draumur Íslands gæti oltið á VAR í kvöld: „Gerir leikinn sanngjarnari“

Það hefur aðeins færst í aukana að notast sé við myndbandsdómara, VAR, í fótbolta kvenna líkt og hjá körlum. Draumur íslenska landsliðsins um að tryggja sér HM-farseðil í kvöld gæti til að mynda ráðist á VAR-ákvörðun.

11. október 2022 11:01

Fámennt á vellinum þegar örlög Íslands ráðast í kvöld

Samkvæmt upplýsingum frá Knattspyrnusambandi Íslands er aðeins búist við um 3.000 áhorfendum á leik Portúgals og Íslands í dag, þar sem leikið verður um sæti á HM kvenna næsta sumar.

11. október 2022 10:16

Mikil tilhlökkun í stuðningsmönnum á leið til Porto

Mikil tilhlökkun var í stuðningsmönnum íslenska kvennalandsliðsins í Flugstöð Leifs Eiríkssonar í morgun þar sem þeir biðu eftir að fara um borð í vél Icelandair á leið til Porto í Portúgal. Stelpurnar okkar mæta landsliði Portúgal síðar í dag.

11. október 2022 07:36

Ekkert rætt eða æft fyrir vítakeppni

Ef að svo fer að úrslitin í leik Portúgals og Íslands í dag ráðast í vítaspyrnukeppni mun Þorsteinn Halldórsson landsliðsþjálfari hafa hraðar hendur og ákveða hvaða fimm leikmönnum sé best treystandi til að taka víti íslenska liðsins.

11. október 2022 09:31

Sannfærð um að fótboltahæfileikar Sveindísar komi frá mömmunni

Mikið mun mæða á Sveindísi Jane Jónsdóttur landsliðskonu í leiknum gegn Portúgal í dag. Vonarstjarna íslensks fótbolta á dyggan stuðningshóp sem verður á sínum stað í stúkunni ytra.

11. október 2022 09:00

Sæti á HM, nístandi vonbrigði eða vító og vesen

Bandaríkin, Brasilía, Kína, England og mögulega litla Ísland. Það skýrist í kvöld hvort Ísland verður í hópi 32ja bestu þjóða heims á HM kvenna í fótbolta næsta sumar. Mögulega, en það er ólíklegt, þurfa Íslendingar að bíða fram í febrúar á næsta ári með að fá endanlega niðurstöðu.

11. október 2022 08:00