Jón Daði tryggði Bolton dramatískan sigur

Hvorugu liðinu tókst að koma boltanum í netið í fyrri hálfleik og staðan var því enn markalaus þegar gengið var til búningsherbergja.

Fyrsta mark leiksins leit ekki dagsins ljós fyrr en á 73. mínútu þegar Sam Hughes kom gestunum í Burton yfir, en mínútu síðar kom Jón Daði inn af varamannabekknum og hann átti eftir að reynast örlagavaldurinn í kvöld.

Amadou Bakayoko jafnaði metin fyrir Bolton á 87. mínútu áður en Jón Daði tryggði liðinu dramatískan sigur með seinustu spyrnu leiksins á áttundu mínútu uppbótartíma.

Niðurstaðan því 2-1 sigur Bolton sem nú situr í fimmta sæti ensku C-deildarinnar með 27 stig eftir 15 leiki, 15 stigum meira en Burton sem situr í næstneðsta sæti.