Vill losna við heimsmeistarann sem hagaði sér eins og fífl

Martínez varði mark Argentínumanna er liðið varð heimsmeistari í fyrsta sinn síðan 1986. Martínez átti stóran þátt í sigri argentínska liðsins og fékk gullhanskann að mótinu loknu.

Þessi þrítugi markvörður hefur þó aðallega fangað athygli fjölmiðla undanfarna daga fyrir hegðun sína eftir að heimsmeistaratitillinn var tryggður. Hann lék sér til að mynda á áhugaverðan hátt með gullhanskann eftir leik, bað liðsfélaga sína um að hafa mínútu þögn fyrir Kylian Mbappé og mætti með Mbappé brúðu í fögnuð argentínska liðsins við heimkomuna.

Ef marka má spænska miðilinn Fichajes er knattspyrnustjóri Aston Villa, Unai Emery, ekki mjög hrifinn af þessum fíflalátum í markverðinum. Á miðlinum kemur meðal annars fram að stjórinn vilji losna við Martínez sem fyrst og að hann gæti því verið seldur þegar félagsskiptaglugginn opnar í janúar.

Martínez hefur staðið í marki Aston Villa undanfarin tvö ár og átt góðu gengi að fagna. Þá lék hann sinn fyrsta landsleik fyrir Argentínu á seinasta ári og síðan hann var settur í ramman hefur liðið fagnað tveimur stórum titlum, Suður-Ameríkutitlinum og heimsmeistaratitlinum.