Rakel Orra segir litlu brjóstin hafa verið lykilinn að heilsunni

Í nokkur ár hafði Rakel gengið á milli lækna í leit að svörum við óútskýrðri þreytu og líkamlegum kvillum sem hún gerði sér ekki grein fyrir að gæti tengst sílíkonpúðunum í brjóstunum.

„Ég fór að fá rosalega mikla verki í liðina, þurra húð, útbrot á líkamann og fékk aldrei neinar útskýringar. Ég var í raun farin að sætta mig við það,“ segir Rakel.

Í lok árs 2022 var heilsuleysið orðið verulega hamlandi þar sem Rakel komst ekki fram úr rúminu. 

„Ég var með svo mikla verki í liðunum, þreytt, pirring í líkamanum og búið að greina mig með sjálfsónæmissjúkdóminn IBS,“ segir Rakel sem hafði prófað hin ýmsu lyf. Ekkert þeirra hafði þó skilað tilætluðum árangri.

„Ég var komin í ferli til að kanna hvort ég væri með vefjagigt. Í heimsókn hjá heimilislækninum spurði hann hvort ég væri með sílikon í brjóstunum sem gætu hugsanlega vera orsakavaldurinn,“ segir Rakel.

Verkjalaus og full af orku

Í fyrstu þótti Rakel það erfið tilhugsun að brjóstin væru orsakavaldurinn. 

„Ég fór svo að setja það á vogarskálarnar. Brjóstin eru núll prósent virði ef þú hefur ekki heilsuna þína,“ segir Rakel sem fór og hitti lýtalækni í kjölfarið sem sagði einkenni hennar lýsandi fyrir BII, eða breast implant illness.

„Mér leið í fyrsta skipti eins og einhver hlustaði á mig,“ segir Rakel. Hún er nú verkjalaus og full af orku eftir að púðarnir voru fjarlægðir.

Að sögn Rakelar áttaði hún sig fljótt á því að stærð brjóstanna skipti ekki máli þegar kæmi að hennar kynferðislega öryggi. Það fælist í hennar eigin sjálfsöryggi og fyrir hvað hún stæði. 

„Ég settist niður með sjálfri mér og spurði mig hvert mitt virði væri. Svarið var engan veginn brjóstin á mér. Mitt virði er mín einlægni og hvernig ég kem fram við sjálfa mig, fólkið í kringum mig og ókunnuga. Mitt virði er það sem ég get gefið af mér og það sem ég áorka og mín gildi í lífinu,“ segir Rakel.

„Þegar ég sá þetta svona þá fannst mér þetta bara no brainer,“ segir Rakel. Hún segist ekki sjá eftir ákvörðuninni í eina sekúndu. 

„Svo skemmir það ekki fyrir að fá að kaupa sér ný undirföt og bikiní,“ 

segir Rakel og hlær.

Tvítug með lítið sjálfstraust

Rakel var tuttugu og eins árs þegar hún eignaðist eldri dóttur sína. Hún rifjar upp hvernig hún hafi gert allt til þess að fá sér sílíkon í von um aukið sjálfstraust. 

„Ég var nýbúin að vera með barn á brjósti og gat ekki verið með lítil krumpubrjóst. Ég tók einhvern yfirdrátt, algjör klikkun,“ segir Rakel um ákvörðunina fyrir rúmum fimmtán árum síðan.

„Núna er ég í skál AA en var í D. Ég elska þessi litlu brjóst sem gáfu mér heilsuna mína til baka og er svo þakklát að þetta hafi verið málið,“ segir Rakel einlæg.