Hefur engar áhyggjur af framtíð Salah hjá Liverpool

Eftir 4-1 sigur Manchester United gegn Chelsea síðastliðinn fimmtudag var ljóst að Liverpool á ekki möguleika á að vinna sér inn sæti í Meistaradeild Evrópu. Salah birti þá færslu eftir leikinn þar sem hann segist niðurbrotinn og að það sé algjört lágmark að Liverpool endi í Meistaradeildarsæti.

Nú er hins vegar ljóst að sama hvað gerist í lokaumferð ensku úrvalsdeildarinnar á morgun mun Liverpool hafna í fimmta sæti og fer því í Evrópudeildina á næsta tímabili.

„Mo elskar að vera hérna og hann var hluti af þessu liði,“ sagði Klopp er hann var spurður út í framtíð Salah á blaðamannafundi í gær.

„Hann baðst afsökunar á því sem við gerðum á tímabilinu. Hann baðst ekki afsökunar á því sem hinir gæjarnir í liðinu gerðu.“

„Ég hef engar áhyggjur. Ég las það sem hann sagði á Twitter, en ég gat ekki lesið neitt í þá átt að hann vildi fara. Ef einhver leikmaður kæmi til mín og myndi segja að hann þyrfti að fara frá félaginu af því að við komumst ekki í Meistaradeildina þá myndi ég keyra hann í annað félag sjálfur,“ bætti Klopp við.

Salah gekk í raðir Liverpool árið 2017 og hefur síðan þá leikið 217 deildarleiki fyrir félagið og skorað í þeim 137 mörk. Hann skrifaði undir nýjan þriggja ára samning við félagið síðasta sumar.