Búið að lofa Rice að hann megi fara

Þessi 24 ára gamli miðjumaður hefur verið gríðarlega mikilvægur hlekkur í liði West Ham undanfarin tímabil og mörg af stórliðum Evrópu hafa fylgst náði með stöðu hans hjá liðinu.

Eftir að liðið tryggði sér sinn fyrsta Evróputitil síðan árið 1965 í gær var Sullivan spurður út í stöðu Rice hjá félaginu. Sullivan var spurður út í það hvort þetta hafi verið seinasti leikur miðjumannsins fyrir félagið og svarið var nokkuð einfalt.

„Ég held að það hljóti að vera,“ sagpi Sullivan. „Við lofuðum honum að hann mætti fara. Hann er búinn að ákveða það að hann vilji fara.“

Þrátt fyrir að West Ham hafi boðið Rice nýjan og endurbættan samning er leikmaðurinn staðráðinn í því að finna sér nýja áskorun. Núverandi samningur hans gildir út næsta tímabil, en West Ham hefur möguleika á að framlengja um eitt ár.

„Við buðum honum 200 þúsund pund á viku fyrir einu og hálfu ári, en hann hafnaði því. Það er búið að kosta hann tíu milljónir punda í töpuð laun á þeim tíma. Hann vill fara og þú getur ekki haldið leikmanni sem vill ekki vera áfram. Tilboðin munu byrja að berast í dag,“ sagði Sullivan að lokum.

Declan Rice hefur leikið 204 deildarleiki fyrir West Ham þar sem hann er uppalinn. Hann hefur verið orðaður við stórlið á borð við Arsenal og Manchester United.