Seldu upp Eld­borg á hálf­tíma

Þarf alltaf að vera grín? heitir hlaðvarpið sem um ræðir og er það afar vinsæl. Að sögn stjórnendanna fær hver hlaðvarpsþáttur um tuttugu þúsund hlustanir. Það var því mikil eftirspurn eftir miðunum. 

„Það seldist upp í forsölu hjá okkur og þetta var einungis fyrir áskrifendur hlaðvarpsins,“ segir Ingó í samtali við Vísi. 

Hægt er að nálgast hlaðvarpsþættina á helstu streymisveitum en áskrifendur fá auk þess fleiri þætti og aðganga að forsölu fyrir svona sýningar. „Allir miðarnir fóru í forsölu og allir miðarnir seldust í forsölunni á þrjátíu og fimm mínútum,“ segir Tinna.

„Meira fjör, meira gaman“

Hlaðvarpið fagnar fimm ára afmæli sínu á þessu ári og er það ástæðan fyrir því að ákveðið var að halda sýninguna í Eldborg. Alls hafa þau haldið sýningar sem þessar átta sinnum áður. Það þýðir þó ekki að þær séu allar eins.

„Þú færð aldrei það sama,“ segir Ingó. Hann segir að einu sinni hafi þau haldið tvær sýningar í röð á Akureyri. Þær hafi þó verið alveg ólíkar, í raun hafi verið um tvær mismunandi sýningar að ræða.

Þá eru sýningarnar ekki alveg eins og hlaðvarpsþættirnir. „Þetta er meira „show“ heldur en þegar það er hlustað á okkur í eyrunum. Þetta er meira fjör, meira gaman og það verður afmælisstemning þarna í Eldborg. Þannig það verður mögulega einhver smá breyting á showinu,“ segir Ingó.

„En alla jafna er þetta með mjög svipuðu sniði og þátturinn en með aðeins meiri stemningu. Áhorfendur taka þátt, geta sent spurningar og svoleiðis,“ segir Tinna svo.

Hugmyndin kom frá hlustendum

Hlaðvarpsstjórnendurnir segja að þetta sé klárlega það stærsta sem þau hafa gert. Hugmyndin um að vera með sýningu í Eldborg hafi þó ekki upphaflega verið þeirra.

„Við ákváðum að fara í Eldborg út af áskorun frá hlustendunum okkar. Við höfum verið að selja fjögur hundruð miða á undir mínútu þannig það þurfti að fara í eitthvað stærra. Þau gerðu svona undirskriftarlista, þannig við erum mjög þakklát þeim að hafa peppað okkur upp í þetta.“

Að lokum vilja þau fá að þakka hlustendum sínum.