Segir flökku­­sögu um sig sýna hvert um­­ræðan sé komin

Þetta kom fram í Sprengi­sandi á Bylgjunni þar sem Hanna var gestur. Há­vær gagn­rýni og upp­lýsinga­ó­reiða hefur ein­kennt um­ræðu um kyn­fræðslu grunn­skóla­barna síðustu daga þar sem Sam­tökin '78 og hin­segin fræðsla þeirra hafa meðal annars verið dregin inn í um­ræðuna.

Skelin þunn

Hanna segir stöðuna dapra og rekur um­ræðuna meðal annars til Evrópu og Banda­ríkjanna þar sem spjótunum sé í auknum mæli beint gegn mann­réttindum trans fólks. Hanna segist hafa komið af sam­stöðu­fundi hin­segin fólks í gær.

„Og það skar mig í hjartað að tala við fólk á mínum aldri sem fór einna verst út úr bar­áttunni, for­dómunum og hatrinu fyrir ein­hverjum þrjá­tíu árum síðan, náði sér kannski aldrei alveg en náði að halda haus og komast standandi út úr því, er eigin­lega að bugast aftur. Hún er svo þunn skelin. Þetta er svo ævin­týra­lega ljótt.“

Á mörkunum að geta hlegið

„Bara svo að þú hafir ein­hverja mynd af klikkuninni sem er í gangi, þá er það í dreifingu á sam­fé­lags­miðlum að ég og Ragn­hildur konan mín séum hlut­hafar í stóru heil­brigðis­fyrir­tæki á Ís­landi sem selji lyf sem ætlað er að auð­velda kyn­ferðis­lega mis­notkun á börnum og að af þessum við­skiptum sé ég orðin svo rík, að ég sé að stunda peninga­þvætti.“

Hanna Katrín segir tvennt rétt í því, hún hafi einu sinni unnið hjá heil­brigðis­fyrir­tæki og síðan hafi hún fyrir ári síðan birt Face­book færslu um það að hún hafi fengið at­huga­semd á flug­velli þegar hún hugðist taka út 50 evrur í gjald­eyri eftir að hún hafi sagst vera stjórn­mála­maður. Hanna Katrín var framkvæmdastjóri heilbrigðissviðs Icepharma frá 2012 til 2016.

„Bara til þess að sýna á hvaða stigi þetta er og ég get hlegið að þessu,“ segir Hanna Katrín. 

Það er rétt á mörkunum?

„Það er rétt á mörkunum nefni­lega og ég er viss um að ég gæti elt þetta uppi og gert eitt­hvað úr því, af því að við erum jú með lög­gjöf gegn svona og fyrir stjórn­mála­mann þá er þetta ekkert grín heldur að fleyta svona sögu. En þetta sýnir bara, að ég veit það ekki, við verðum að staldra við og reyna að­eins að átta okkur á því á hvaða veg­ferð við erum.“

Snúist um við­nám lýð­ræðisins

Hanna Katrín segir um­ræðuna nú um minni­hluta­hópa í hin­segin sam­fé­laginu snúast um við­náms­þrótt lýð­ræðisins. Ís­lendingar verði að fara að átta sig á þessu.

„Þetta er ekki eitt­hvað sem við getum bara grátið yfir ein­mitt, eða hlegið að eða hneykslast á eða barist gegn í litlum brotum út um allt sam­fé­lagið. Við verðum að fara að á­kveða hvernig sam­fé­lag við ætlum að vera hérna. Við ætlum ekki að vera sam­fé­lag sem stýrist af fals­fréttum og skipu­lögðum á­róðurs­her­ferðum gegn litlum ein­staka hópum og búa þannig til far­veginn fyrir öfga­öfl. Það er ekki það sem ís­lenskt sam­fé­lag ætlar að vera.“