Um­fjöllun og myndir: Ís­land - Fær­eyjar 30-29 | Sigur en engin flug­elda­sýning

Ísland vann torsóttan sigur gegn Færeyjum 30-29. Ísland var fjórum mörkum yfir í hálfleik en gestirnir spiluðu afar vel í síðari hálfleik sem gerði Íslandi erfitt fyrir. 

Ísland mætti með sjálfstraustið í botni eftir fimmtán marka sigur gegn Færeyjum í gær 39-24. Ísland komst snemma þremur mörkum yfir 4-1.

Um miðjan fyrri hálfleik jafnaðist leikurinn út og gestirnir fóru að spila betur. Í fyrri hálfleik var þeirra langbesti leikmaður Hákun West av Teigum sem skoraði sex mörk úr hægra horninu. Gestirnir tóku leikhlé í stöðunni 9-7. Leikhléið skilaði sér og gestirnir komust yfir 10-11.

Strákarnir okkar voru þó ekki lengi undir og svöruðu með því að gera fjögur mörk í röð og komust þremur mörkum yfir 14-11. Ísland var fjórum mörkum yfir í hálfleik 16-12.

Markaskorun Íslands dreifðist á níu leikmenn. Viggó Kristjánsson og Ómar Ingi Magnússon voru markahæstir hjá Íslandi í fyrri hálfleik en þeir skoruðu þrjú mörk hvor.

Síðari hálfleikurinn var brösóttur. Ísland var í vandræðum með sóknarleik gestanna sem spiluðu með sjö leikmenn í sókn. Færeyjar komust tveimur mörkum yfir 21-23 en þá kom áhlaup hjá heimamönnum sem gerðu þrjú mörk í röð.

Lokamínúturnar voru æsispennandi þegar að sjö mínútur voru eftir voru gestirnir yfir. Í stöðunni 27-27 skoraði íslenska liðið tvö mörk í röð og sigurinn var í höfn. Viktor Gísli Hallgrímsson varði dauðafæri sem fór langt með sigurinn.

Viktor Gísli spilaði allan fyrri hálfleikinn. Björgvin Páll Gústavsson spilaði fyrstu tuttugu mínúturnar í síðari hálfleik en náði sér ekki á strik og Viktor spilaði síðustu mínúturnar. Viktor endaði á að verja tíu skot og var með 40 prósent markvörslu.

Eftir að hafa aðeins skorað tólf mörk í fyrri hálfleik skoruðu gestirnir sautján mörk í síðari hálfleik. Íslenska liðið átti í miklum vandræðum með að leysa sóknarleik Færeyinganna þar sem Elias Ellefsen á Skipagøtu spilaði afar vel. Elías skoraði átta mörk og skapaði mikið af færum.

Leikurinn endaði með eins marks sigri Íslands 30-29. Liðið kemur næst saman í desember þar sem þeir munu undirbúa sig fyrir Evrópumótið í janúar.