Sex­tán ár og vistun á stofnun fyrir morðið á barns­hafandi konu

Málið vakti mikinn óhug í Danmörku þegar það kom upp. Konan, hin 37 ára Sana Yaseen, var á leið heim af vakt á hjúkrunarheimili þar hún starfaði sem hjúkrunarfræðingur þegar ráðist var á hana.

Danskir fjölmiðlar segja að Yaseen, sem hafi verið gengin 26 vikur, hafi verið að setjast upp í bíl sinn eftir kvöldvakt þegar ungur maður, klæddur dökkum fatnaði, hafa nálgast hana. Á fjögurra mínútna tímabili hafi hann svo stungið Yaseen 78 sinnum með hníf, skorið hana á háls og dregið hana út úr bílnum.

Yaseen var úrskurðuð látin á sjúkrahúsinu. Ófæddur sonur hennar var tekinn með keisaraskurði en lést svo á sjúkrahúsinu fimm dögum síðar.

Afganskir ríkisborgarar

Kviðdómur í málinu komst í morgun að þeirri niðurstöðu að Ullah hafi gerst sekur um manndráp og 34 ára kona um samverknað. Yaseen var afganskur ríkisborgari sem búsett var í Danmörku, en þau sem sakfelld voru fyrir morðið voru einnig afganskir ríkisborgarar.

Danska TV2 segir frá því að 34 ára konan hafi greint frá því í skýrslutökum að hún hafi verið meðleigjandi Yaseen auk þess að þær hafi átt í ástarsambandi. Þær hafi á sínum tíma komið til Danmerkur frá Afganistan árið 2011.

Saksóknarar sögðu konuna hafa skipulagt morðið á Yaseen með Ullah á samskiptaforritinu WhatsApp. Konan hafi þannig upplýst manninn um vinnutíma Yaseen á hjúkrunarheimilinu við Samsøvej í Holbæk þannig að hann gæti nálgast hana að loknum vinnudegi hennar og ráðið henni bana.

Hótaði Yaseen og barni hennar ítrekað lífláti

Gögn úr farsíma mannsins sýndu að maðurinn hafi haldið frá heimili fyrir hælisletendur, þar sem hann dvaldi, og að vinnustað Yaseen í Holbæk. Hafi hin tvö dæmdu verið í miklum samskiptum, allt þar til að Yaseen var myrt.

Danskir fjölmiðlar segja að ástæða morðsins liggi ekki að fullu fyrir, en bæði maðurinn og konan neituðu sök í málinu.

Við meðferð málsins voru lagðar fram hljóðupptökur þar sem heyra mátti hina 34 ára konu Yaseen og ófæddu barni hennar lífláti. Þá þótti sannað að hin 34 ára konan hafi verið afbrýðisöm út í Yaseen.

Fram kom við skýrslutökur að Yaseen hafi verið fljót að læra dönsku eftir komuna til landsins frá Afganistan, fengið vinnu og náð að aðlagast lífinu í Danmörku. Hún hafi orðið ólétt og gift sig með manni á ferð erlendis og ætlað sér að fá manninn til Danmerkur þar sem áætlunin var að hann myndi búa með Yaseen og hinni 34 ára konu. Þannig hafi Yaseen greint yfirmanni sínum frá því að 34 ára konan hafi átt að sjá um heimilið og passa börnin. Þá kom einnig fram að hin 34 ára kona hafi glímt við þunglyndi og ekki náð að aðlagast lífinu í Danmörku með sama hætti og Yaseen.

Blóð á fatnaði

Ennfremur kom fram við aðalmeðferð að Ullah hafi komist í samband við konurnar á TikTok. Maðurinn greindi dómara frá því að hann hafi orðið ástfanginn af 34 ára konunni, en að Yaseen hafi reynt að koma í veg fyrir það að þau myndu giftast. 34 ára konan greindi hins vegar dómara frá því að hún hefði ekki haft áhuga á manninum og taldi þau einungis vera vini.

Við rannsókn kom í ljós að lögregla hafi fundið blóð í fötum Ullah, sem að öllum líkindum hafi verið úr Yaseen. Hann hafi svo keypt ný föt daginn eftir morðið.

Vistuð á viðeigandi stofnun vegna þroskaskerðingar

Ullah var dæmdur til sextán ára fangelsisvistar en konan hlaut ekki refsidóm vegna þess að hún er þroskaskert. Hún verður þó vistuð ótímabundið á viðeigandi stofnun fyrir fólk með alvarlega andlega fötlun.

Fréttin hefur verið uppfærð.