Fann gamlan vin í leit sinni að nýju og breyttu lífi

Starfið hjá Kefla­vík markar endur­komu Frið­riks Inga í þjálfun en hann hefur ekki þjálfað lið síðan árið 2022. Fyrir því er gild á­stæða en Frið­rik og fjöl­skylda hans fengu á sínum tíma í hendurnar ógnar­stórt verk­efni þegar að eigin­kona hans og lífs­föru­nautur til þrjá­tíu og fimm ára, Anna Þórunn Sigur­jóns­dóttir greindist með krabba­mein.

Á stundum sem þessum verður lífið mun meira og stærra en körfu­bolti eða í­þróttir og stóðu Frið­rik Ingi og börnin þeirra tvö þétt við bakið á sinni konu. Eftir hetju­lega bar­áttu við meinið kvaddi Anna Þórunn þessa jarð­vist á síðasta ári. 

Svona lífs­reynsla, við­líka á­fall, hefur á­hrif á fólk. Að­stæður breytast og Frið­rik finnur það nú að hann er ekki reiðu­búinn að gefa körfu­boltann upp á bátinn. Það er eitt­hvað sem togar í hann.

„Ein­hver yngri út­gáfa af mér sem hefur svo­lítið verið að tala í gegnum mig. Ég svona fer að­eins af sjónar­sviðinu eftir að hafa verið með ÍR fyrir tveimur árum síðan. Það komu upp veikindi í fjöl­skyldunni sem að reyndu svo­lítið á. Ég þurfti að neita nokkrum liðum sem að leituðu til mín á síðast­liðnu tveimur árum þar sem að að­stæður voru bara þannig. Þær voru bara mjög erfiðar og krefjandi.“ 

„Svo hafa ýmsir fag­aðilar, sem ég hef leitað til í minni leit að nýju og breyttu lífi, skorað á mig og sagt mér að það gæti verið mjög gott fyrir mig að láta slag standa og fara aftur í þjálfun. Að því gefnu að ég hafi enn brennandi á­huga og vilja. Hann hefur aldrei horfið í rauninni. Ég er því bara gríðar­lega spenntur fyrir því að takast á við þetta verk­efni.“

Körfuboltinn hefur aldrei verið langt undan hjá Friðriki.

„Ég byrjaði að þjálfa sextán ára gamall. Er 55 ára í dag, 56 ára eftir nokkra daga. Körfuboltinn hefur verið stór hluti af mínu lífi. Ég hef þjálfað bæði karla og kvennaflokka. Ég þjálfaði líka handbolta á mínum yngri árum. Þjálfarinn er mjög ríkur í mér.

Það er auðvitað bara þannig að það er erfitt að slíta sig frá þessu. Hausinn á mér er yfirleitt alltaf uppfullur af hugmyndum og pælingum. Þegar að ég horfi á körfubolta þá er hausinn á mér alltaf á fullu að pæla í alls konar taktík og pælingum. Ég hef í rauninni verið þess heiðurs aðnjótandi að vera talsvert innvinklaður í boltann. 

Vegna þess að það eru margir þjálfarar sem eru að þjálfa í efstu deildum karla og kvenna sem eru ýmist fyrrverandi leikmenn mínir eða aðstoðarþjálfarar. Ég er auðvitað mjög þakklátur fyrir það að þeir leita talsvert til mín. Ég reyni að vera þeim til halds og trausts eins og ég mögulega get.“