Hann segir einhverja starfsmenn HS Orku farna til vinnu inn á Svartsengi og að lögregla hafi sömuleiðis hleypt fólki inn til Grindavíkur sem þar starfi. Hann segir rýmingu enn í gangi.
„Það er eitthvað sem við skoðum í dag og tökum afstöðu til,“ segir Úlfar um það hvort að þeir íbúar sem höfðu verið að gista í Grindavík fái að fara aftur í bæinn í dag. Fram kom í fréttum í gær að um gist hafi verið í um 22 húsum.
Úlfar segir viðbragðsaðila nokkuð sátta við stöðuna eins og hún er núna en að enn sé verið að reyna að átta sig á stöðunni.
Hann segir töluverðan áhuga á eldgosinu og marga stöðva við gatnamót Reykjanesbrautar og Grindavíkur.
„Það eru margir sem staldra þar við og taka myndir. Það er góður útsýnisstaður,“ segir hann og að hann geri ekki athugasemdir við að fólk stöðvi þar til að skoða. Það sé verra þegar það stöðvar bíla sína út í vegkant á Reykjanesbrautinni.
