Óttast að næstu „ljónsungar“ kalífadæmisins valdi usla

Börnum er smyglað út úr búðunum og látin ganga til liðs við hryðjuverkasamtökin

Kúrdar reka einnig aðrar búðir í Sýrlandi sem hýsa eiginkonur erlendra vígamanna ISIS og börn þeirra. Í heildina halda þeir um 55 þúsund konum og börnum í þessum búðum. Al hol eru þó lang stærstu búðirnar.

Sýrlenskir Kúrdar hafa um árabil kvartað yfir því að hafa setið uppi með fjölskyldur erlendra vígamanna Íslamska ríkisins og börn þeirra. Ríkisstjórnir heimaríkja þeirra hafa ekki viljað taka við þeim og því hafa þessar konur og börnin þeirra setið föst í búðunum um árabil.

Sjá einnig: Kalla enn eftir því að losna við konur og börn Íslamska ríkisins

Búðirnar eru gífurlega umfangsmiklar en rúmlega sextíu prósent þeirra sem haldið er þar eru börn. Þau eru um 22 þúsund talsins og þekkja mörg þeirra ekkert annað en búðirnar. Þar hafa börnin lifað við slæmar aðstæður og að hætti Kalífadæmis Íslamska ríkisins.

Gildi ISIS eru sögð hafa lifað þar góðu lífi og þeir sem neita að fylgja þeim hafa orðið fyrir miklu ofbeldi annarra fanga þar. Kúrdar hafa lengi lýst yfir áhyggjum af því að börnin öfgavæðist mjög og að verið sé að hýsa þúsundir af vígamönnum framtíðarinnar í þessum búðum.

Fréttakona og tökumaður Sky News heimsóttu búðirnar á dögunum og fóru þar um í fylgd vopnaðra varða. Börnin umkringdu þau og grýttu, auk þess sem ungir drengir kölluðu: „Við munum afhöfða ykkur“ og „Einn daginn munum við ráða. ISIS mun snúa aftur.“

Kúrdar halda einnig fjölmörgum erlendum vígamönnum ISIS í fangelsi og eru margir þeirra frá Evrópu.

Bandaríkin hafa lengi fjármagnað rekstur þessara búða að mestu en Donald Trump hefur bundið enda á þær fjárveitingar. Það hefur aukið á áhyggjur ráðamanna í Sýrlandi og í Evrópu um framtíð búðanna og þessa fólks.

Sjá einnig: ISIS-systur aftur komnar til Noregs

Utanríkisþjónusta Evrópusambandsins mun á morgun halda neyðarfund vegna búðanna. Politcio segir að meðal annars standi til að ræða hvað eigi að gera verði búðunum lokað og hefur miðillinn eftir einum heimildarmanni innan utanríkisþjónustunnar að Evrópubúarnir í búðunum séu ekki fólk sem ráðamenn vilji taka opnum örmum.

Því verður til umræðu að taka upp bagga Bandaríkjamanna og fjármagna rekstur búðanna áfram.

Annar heimildarmaður Politico sagði nauðsynlegt að tryggja að hryðjuverkmenn í búðunum kæmu ekki til Evrópu.

France24 fjallaði einnig um skortinn á fjármagni vegna búðanna á dögunum.

Yfirmenn al Hol búðanna segja árásum innan og utan búðanna hafa fjölgað verulega frá því ríkisstjórn Bashars al-Assads féll og hann flúði til Rússlands. Vígamenn Íslamska ríkisins séu að nýta sér óreiðuna. Vopnum sé smyglað inn í búðirnar og fólki sé smyglað út og því hjálpað að flýja.

Yfirmaður búðanna sagði í samtali við Sky að börnin sem fara frá búðunum endi hjá ISIS og verði næstu „ljónsungar“ kalífadæmisins. Það var titillinn sem leiðtogar Kalífadæmisins gáfu barnavígamönnum þeirra á árum áður.

Hryðjuverkasamtökin rændu hundruðum ef ekki þúsundum barna í Írak og Sýrlandi, þjálfuðu þau til ódæðisverka og létu þau jafnvel taka fanga af lífi í áróðursmyndböndum. Í einu slíku tilfelli var fjögurra ára drengur látinn skjóta mann í höfuðið og tveir eldri látnir skera fanga á háls.

Fregnir bárust einnig af því að þroskaskert börn væru notuð til sjálfsmorðsárása.