Segir réttarríkið standa í vegi sínum

Í viðtalinu spurði Kirsten Welker Trump hvort hann væri sammála Marco Rubio, utanríkisráðherra sínum, um að ríkisborgarar og aðrir í Bandaríkjunum eigi rétt á réttlátri málsmeðferð.

„Ég veit það ekki. Ég er ekki, ég er ekki lögmaður. Ég veit það ekki,“ svaraði Trump.

Welker minnti hann þá á ákvæði stjórnarskrár Bandaríkjanna segja berum orðum að allir, hvort sem þeir eru ríkisborgarar eða ekki, eigi þennan rétt. Eins og fram kemur í bæði fimmta og fjórtánda viðbótarákvæðum stjórnarskrár Bandaríkjanna.

„Ég veit ekki. Mér sýnist, það gæti staðið þarna en ef við erum að tala um það, þá þyrftum við að hafa milljón, eða tvær milljónir, eða þrjár milljónir réttarhalda. Við erum með þúsundir manna og þar á meðal morðingja og fíkniefnasala og suma af verstu mönnum jarðarinnar,“ sagði Trump.

„Suma af verstu, hættulegustu mönnum jarðar. Ég var kosinn til að koma þeim úr landi og dómstólar standa í vegi mínum.“

Welker spurði Trump þá hvort að hann þyrfti ekki að framfylgja stjórnarskránni, burtséð frá fjölda þeirra sem hann ætlaði að vísa úr landi, þar sem hann væri forseti. Forsetar Bandaríkjanna sverja þess eið við embættistöku að standa vörð um stjórnarskrá ríkisins.

„Ég veit það ekki. Ég verð að svara með því að segja, aftur, að ég er með frábæra lögmenn í vinnu fyrir mig og við munum auðvitað fylgja því sem hæstiréttur segir. Það sem þú segir er ekki það sem ég hef heyrt frá hæstarétti. Þeir eru með aðra túlkun.“

Þá var Trump spurður hvort einhver í ríkisstjórn hans væri í samskiptum við yfirvöld í El Salvador, þar sem maður að nafni Kilmar Abrego Garcia er í fangelsi, eftir að hafa verið vísað fyrir mistök frá Bandaríkjunum á þeim grundvelli að hann væri meðlimur í alræmdu glæpagengi. Hann fékk þó aldrei að fara fyrir dómara áður en honum var vísað úr landi.

Trump svaraði á þá leið að ræða þyrfti það við dómsmálaráðherra hans.

Dómarar á öllum stigum réttarkerfis Bandaríkjanna, og þar á meðal Hæstiréttur, hafa sagt að Garcia hafi verið ranglega fluttur úr landi og koma eigi honum aftur til Bandaríkjanna.

Dómstólar hafa ítrekað staðið í vegi Trumps frá því hann tók aftur við embætti forseta og hefur hann verið mjög gagnrýninn í garð dómara vegna þessa. Hans helst embættismenn og ráðgjafar hafa ítrekað haldið því fram að hann eigi ekki endilega að framfylgja úrskurðum dómara og hefur hann sjálfur kallað eftir því að vísa dómurum úr embætti og hunsað áðurnefndan úrskurð hæstaréttar um mál Garcia.

Hans helst embættismenn og ráðgjafar hafa ítrekað haldið því fram að hann eigi ekki endilega að framfylgja úrskurðum dómara og hefur hann sjálfur kallað eftir því að vísa dómurum úr embætti og hunsað áðurnefndan úrskurð hæstaréttar um mál Garcia.

Sagðist ekki sækjast eftir þriðja kjörtímabilinu

Í viðtalinu, þar sem farið var um víðan völl, sagðist Trump ekki ætla að sækjast eftir þriðja kjörtímabilinu, eins og hann hefur ítrekað gefið í skyn. Hann sagðist njóta mikils stuðnings varðandi þriðja kjörtímabilið en það væri ekki eitthvað sem hann ætlaði sér.

Sjá einnig: „Ekki að grínast“ um þriðja kjör­tíma­bilið

Stjórnarskrá Bandaríkjanna kveður á um að enginn forseti megi sitja lengur en tvö kjörtímabil.

Trump sagði JD Vance, varaforseta, og Rubio hafa staðið sig vel í starfi og þær gætu mögulega tekið við keflinu af honum. Margir aðrir kæmu þó til greina en enn sem komið er væri allt of snemmt að segja til um hver hann vildi láta taka við af sér.

Útilokaði ekki að beita hernum í Kanada og Grænlandi

Trump mun á morgun hitta Mark Carney, nýkjörinn forsætisráðherra Kanada, í Hvíta húsinu. Sá fundur verður í skugga þess að Trump hefur beitt Kanada umfangsmiklum tollum að virðist með því markmiði að innlima Kanada og gera ríkið að „51. ríki Bandaríkjanna“.

Í viðtalinu sagði Trump „mjög ólíklegt“ að hann myndi beita hervaldi til að innlima Kanada en útilokaði það ekki.

Hann gaf einnig til kynna að hervald væri líklegra þegar kæmi að Grænlandi, sem Trump vill einnig eignast. Eins og frægt er hefur Donald Trump, forseti Bandaríkjanna, ítrekað sagt að Bandaríkin þurfi að eignast Grænland af öryggisástæðum. Hann hefur ekki viljað útiloka beitingu hervalds og sagt að Grænland verði eign Bandaríkjanna með einum hætti eða öðrum.

Sjá einnig: Sendi Dönum tóninn

„Eitthvað gæti gerst varðandi Grænland,“ sagði Trump í viðtalinu.

„Ég skal vera hreinskilinn. Við þurfum það [Grænland] vegna þjóðar- og alþjóðaöryggis.“

Það slæma Biden að kenna

Þegar talið barst að efnahagi Bandaríkjanna sagði Trump að hagkerfið væri að ganga í gegnum „aðlögunartímabil“. Hann ætti þó von á því að allt myndi ganga frábærlega fyrir sig, þrátt fyrir þá óreiðu og óvissu sem umfangsmikil notkun hans á tollum hefur valdið.

Sjá einnig: Engar við­ræður fyrr en Trump fellir niður tolla

Welker spurði hann út í það að sérfræðingar segðu líkurnar á kreppu hafa aukist og brást Trump reiður við. Hann sagði marga af svokölluðum sérfræðingum búast við því að efnahagur Bandaríkjanna yrði betri en hann yrði nokkurn tímann.

Varðandi þann 0,3 prósenta samdrátt sem hefði orðið í Bandaríkjunum á fyrsta fjórðungi ársins sagði Trump að það væri forvera sínum, Joe Biden, að kenna.

„Ég held að góðu hlutarnir séu hagkerfi Trumps og vondu hlutarnir hagkerfi Bidens, því hann stóð sig hræðilega í starfi.“

Viðtalið í heild sinni má sjá hér að neðan.