Leita „Skrattans í Ozarkfjöllum“ í hellum og skógum

Alríkislögregla Bandaríkjanna (FBI) hefur heitið tíu þúsund dölum fyrir upplýsingar sem leiða til handtöku Hardins.

Hardin, sem er 56 ára gamall, var lögreglustjóri í bænum Gateway í Arkansas. Hann var handtekinn árið 2017 vegna gruns um að hann hefði skotið mág borgarstjóra Gateway í höfuðið og játaði hann morðið. Hann var dæmdur í þrjátíu ára fangelsi en var seinna meir dæmdur í fimmtíu ára fangelsi til viðbótar fyrir nauðgun frá 1997, samkvæmt AP fréttaveitunni.

Það kom í ljós árið 2019 þegar lífsýni frá nauðgunni voru borin saman við önnur sýni í kerfum yfirvalda í Bandaríkjanna. Þá hafði sýni lögreglustjórans verið bætt í kerfið 2017.

Heimildarmynd var gerð um mál Hardins, sem kallast „Skrattinn í Ozarkfjöllum“

Hann strauk úr fangelsi á sunnudaginn með því að klæðast fötum sem líktust lögreglubúning og opnaði vörður dyr fyrir honum án þess að skoða skírteini hans eða skoða hann nánar. Búninginn mun hann hafa búið til sjálfur og er til rannsóknar hvort hann hafi getað gert það vegna starfa hans í eldhúsi fangelsisins.

Sporhundur komst fljótt á spor „djöfulsins“ en tapaði lyktinni tiltölulega fljótt vegna mikillar rigningar. Lögreglan segir marga slíka hunda notaða til leitarinnar í fjöllunum en slæmt veður hefur komið niður á leitinni.

Engar fregnir hafa borist af því að einhverjar vísbendingar um Hardin hafi fundist frá því hann flúði. Talsmenn lögreglunnar segja þó að þar til annað komi í ljós verði gert ráð fyrir að hann sé enn á svæðinu og verður leitað þar.

Leitin er þó erfið, bæði vegna slæms veðurs, og vegna fjölmargra felustaða á svæðinu. Um er að ræða fjalllendi sem er að miklu leyti skógi vaxið. Þarna eru fjölmargir og djúpir hellar auk alls konar skúra og skála og er Hardin kunnugur staðháttum, ef svo má segja.

Sérfræðingur sem ræddi við AP fréttaveituna segir að á svæðinu kringum fangelsið þar sem Hardin strauk megi finna fjölmarga hella. Þeir séu mögulega hvergi fleiri í öllu Arkansas.