Innlent

Ó­kunnugur nætur­gestur á Pat­reks­firði

Samúel Karl Ólason skrifar
Frá Patreksfirði.
Frá Patreksfirði. Vísir/Vilhelm

Lögreglunni á Vestfjörðum barst á laugardagsmorgun tilkynning um sofandi ókunnugan mann í húsi í bænum. Sá gat ekki gefið góðar skýringar á því hvað hann var að gera í húsinu en var honum hjálpað á sinn rétta dvalarstað.

Sömu nótt átti sér stað líkamsárás í bænum en meiðsli munu samkvæmt lögreglunni ekki hafa verið mikil.

Einn gisti fangageymslur lögreglunnar á Ísafirði um helgina vegna ölvunar og óspektar.

Þá voru átta stöðvaðir fyrir of hraðan akstur í síðustu viku en sá sem hraðast ók mældist á 149 kílómetra hraða á Hnífsdalsvegi. Þar er hámarkshraði áttatíu kílómetrar á klukkustund.

Í færslu lögreglunnar á Facebook segir að ökumannsins bíði 230 þúsund króna sekt, ökuleyfissvipting í þrjá mánuði og þrír punktar í ökuferilsskrá.

Lögregluþjónar fóru síðan í eftirlitsflug um Hornstrandir og Jökulfirði í vikunni með áhöfn þyrlu Landhelgisgæslunnar. Meðal annars var verið að svipast um eftir hvítabjörnum á svæðinu en enginn slíkur sást.




Fleiri fréttir

Sjá meira


×