Rann­sökuðu eigin sam­særis­kenningar um fljúgandi furðu­hluti

Rannsakendurnir fundu til að mynda upplýsingar um það að ofursti í flugher Bandaríkjanna fór á bar nærri umdeildri herstöð í Nevada sem kallast Area 51 á níunda áratugnum. Þar afhenti hann eiganda barsins myndir af hlutum sem áttu að geta verið geimskip. Myndirnar fóru upp á vegg í barnum og ýttu undir sögusagnir um leynilegar tilraunir hersins.

Samkvæmt frétt Wall Street Journal höfðu hermenn þó átt við myndirnar og viðurkenndi ofurstinn það í viðtali árið 2023. Hann sagði að markmiðið hefði verið að reyna að hylma yfir það sem var raunverulega að gerast í Area 51, þar sem Bandaríkjamenn voru að þróa mjög leynilegar herþotur sem erfitt er að finna með ratsjám.

Forsvarsmenn herstöðvarinnar töldu að betra væri að ef heimamenn eða aðrir sæju þotur eins og F-117, teldu þeir að þarna væri verið að gera tilraunir á geimskipum en ekki raunverulegum leynilegum herþotum. Sovétmenn myndu ekki taka mark á slíkum fregnum og myndum af þotunum ef þær færu í dreifingu ef þeim fylgdi saga um að þetta væru myndir af fljúgandi furðuhlutum.

Varnarmálaráðuneytið birti í fyrra skýrslu þar sem því var haldið fram að ekkert benti til þess að yfirvöld í Bandaríkjunum vissu af tilvist geimvera og væru að hylma yfir það. Ekki væri verið að gera tilraunir með geimför.

Í frétt WSJ segir að skýrsla ráðuneytisins um að ekkert yfirvarp hafi átt sér stað, sé í raun yfirvarp. Hún snúist þó ekki um að hylja sannanir fyrir samsæriskenningum, heldur sé henni ætlað að hylma yfir það að yfirvöld hafi tekið þátt í að dreifa þessum samsæriskenningum og ýta undir þær.

Upplýsingar sem hefðu getað kveðið samsæriskenningar í kútinn voru ekki birtar í skýrslunni til að leyna yfirstandandi leynilegum verkefnum og til að forðast að smána herinn.

Blaðamenn WSJ ræddu við fjölda embættismanna og yfirmanna í herafla Bandaríkjanna og fóru yfir mikið magn gagna við rannsókn þeirra.

Meðal annars kom í ljós að herinn dreifði fölskum skjölum og upplýsingum til að reyna að hylma yfir það sem var raunverulega að gerast í tengslum við leynilegar rannsóknir og þróun á hergögnum. Það var til að mynda gert til að reyna að koma í veg fyrir að Sovétmenn kæmust á snoðir um veikleika á vörnum Bandaríkjanna og koma í veg fyrir dreifingu upplýsinga um kjarnorkuvopn ríkisins.

Þessar fölsku sögur og gögn fóru í umfangsmikla dreifingu þar sem þær tóku breytingum og öðluðust eigið líf.

Það sem ekki þykir ljóst er hvort að dreifing þessara samsæriskenninga var á vegum yfirmanna tiltekinna herstöðva eða hvort um var að ræða stærri áætlun innan ráðuneytisins.

Skortur á gagnsæi innan ráðuneytisins hefur ýtt enn frekar undir samsæriskenningar. Þingmenn í fulltrúadeild Bandaríkjanna, flestir þeirra Repúblikanar, hafa myndað sérstakan hóp sem ætlar sér að rannsaka fljúgandi furðuhluti. Þeir hafa meðal annars krafist gagna frá leyniþjónustum Bandaríkjanna um það hverjir hafa komið að því að sækja brak úr fljúgandi furðuhlutum.

Umfangsmikill hrekkur

Að hluta til eru samsæriskenningar til komnar vegna undarlegrar busunar en um árabil var nýjum yfirmönnum yfir leynilegum verkefnum afhent mynd af geimfari og þeim sagt að Bandaríkjamenn væru að vinna að því að nýta tæknina úr geimfarinu. Um hrekk var að ræða en mönnunum var í flestum tilfellum aldrei gert grein fyrir því.

Einn forsvarsmanna rannsóknar Varnarmálaráðuneytisins fór árið 2023 á fund Avril Haines, sem var þá yfir öllum leyniþjónustum Bandaríkjanna, og sagði henni frá hrekknum. Haines mun hafa vera mjög brugðið og spurði hvort þessi hrekkur gæti mögulega verið grunnurinn að langvarandi samsæriskenningum um að Bandaríkjamenn hefðu komið höndum yfir brak úr geimfari og hylmt yfir það.

„Við vitum að þetta gekk á í áratugi. Við erum að tala um mörg hundruð manns. Þeir skrifuðu undir samning um þagnarskyldu. Þeir héldu að þetta væri raunverulegt.“

Í yfirlýsingu til WSJ staðfesti talskona Varnarmálaráðuneytisins að vísbendingar um áðurnefndar falskar upplýsingar hefðu fundist og að þær hefðu verið kynntar ráðamönnum. Hún sagði þessi gögn ekki hafa verið birt í skýrslunni í fyrra, vegna þess að rannsókninni hefði ekki verið lokið. Til stæði að birta aðra skýrslu seinna á þessu ári sem innihéldi þessar upplýsingar.