Hús­gagna­höllin sektuð fyrir ósann­gjarnar aug­lýsingar

„Í ákvörðuninni er þess getið að ekki sé nægilegt að tilgreina aðeins að um Tax Free afslátt sé að ræða, heldur þurfi að greina frá upplýsingum um prósentuhlutfall afsláttarins enda kunna mismunandi vörur og þjónusta að bera mismunandi virðisaukaskatt,“ segir í ákvörðun Neytendastofu.

Svokallaðir Tax free afslættir eru eins og kemur fram þegar virðisaukaskattur vöru eru felldir niður, eins og í fríhöfnum flugvalla.

„Þá sé ekki hægt að gera kröfu til þess að neytendur veiti sérstaka athygli hver afreikniprósenta virðisaukaskatts er á hverjum tíma fyrir hvert skattþrep. Auglýsingarnar hafi því verið ósanngjarnar gagnvart neytendum og feli í sér villandi viðskiptahætti.“

Auglýsingarnar sem um ræðir birtust á Facebook síðu félagsins og miðlum RÚV.

Sektarákvörðunin byggðist á fyrri sektarákvörðunum fyrir sambærileg brot.

Gerðu ráðstafanir þegar í stað

Neytendastofa vakti athygli Húsgagnahallarinnar á málinu með bréfi dagsettu 24. mars 2025. Svar frá Húsgagnahöllinni barst tveimur dögum síðar, 26. mars 2025.

Í svarbréfinu þakkaði Húsgagnahöllin fyrir erindi Neytendastofu og kvaðst hafa farið yfir ábendingar þeirra með fullri alvöru.

Húsgagnahöllin leggi ríka áherslu á að fylgja lögum og reglum um viðskiptahætti og markaðssetningu, og vilji tryggja að auglýsingar fyrirtækisins séu í samræmi við gildandi reglur og bestu venjur í neytendaviðskiptum.

„Félagið muni þegar í stað gera ráðstafanir til að tryggja að allar auglýsingar sem vísa til afslátta, hvort sem þær birtast á samfélagsmiðlum, í sjónvarpi eða á öðrum miðlum, gefi skýrar upplýsingar um afsláttinn í samræmi við ákvæði laga nr. 57/2005 og reglur nr. 366/2008.“

„Húsgagnahöllin leggi sig í hvívetna við að gera þetta ávallt rétt en það hafi því miður misfarist í þessum auglýsingum eins og stofnunin bendi réttilega á.“

Ákvörðun Neytendastofu.