Styttan tekin niður eftir harðar deilur um klúran barm

Styttan er tæplega fjögurra metra há og leit dagsins ljós árið 2006, og var þá staðsett nokkuð hundrað metrum frá sjálfri litlu hafmeyjunni í Kaupmannahöfn. 

Árið 2018 var hún svo færð suður til Drageyrar vegna fjölmargra kvartana um að hún væri of kynferðisleg og særði blygðunarkennd vegfarenda, en barmur styttunnar hefur verið viðfang harðra deilna frá upphafi.

Styttan falli ekki inn í umhverfið

Menningarmálaráðuneyti Danmerkur hefur ákveðið að fjarlægja styttuna, en sagt er að styttan passi illa saman við menningarlega arfleið Drageyrarvirkis, sem byggt var árið 1910.

Mathias Kryger, listagagnrýnandi dagblaðsins Politiken, hefur lýst styttunni sem klámfenginni.

Sorine Gotfredsen, blaðamaður dagblaðsins Berlingske, segir að styttan sé blautur draumur karlmanna um það hvernig konur eigi að líta út. Styttan stuðli ekki að aukinni líkamsvirðingu meðal kvenna.

Peter Bech, danskur veitingamaður, er sá sem hannaði og fjármagnaði styttuna. Hann skilur ekkert í gagnrýninni sem styttan hefur þurft að þola.

„Hafmeyjan er í fullkomlega eðlilegum hlutföllum miðað við stærð hennar. Auðvitað eru brjóstin stór á stórri konu,“ segir Peter Bech.

Hann sagði að styttan laðaði að sér ferðamenn og sagði að umræðan um styttuna væri komin út í tóma vitleysu, en hann hefur óskað eftir því að ákvörðun um að taka hana niður verði endurskoðuð.

Hafmeyjan sem tákn Danmerkur

Litla hafmeyjan í Kaupmannahöfn er eitt frægasta mannvirki Danmerkur, en hún er eins og frægt er byggð á ævintýri H.C. Andersen um litlu hafmeyjuna. Hinn hálfíslenski myndhöggvari Edvar Eriksen gerði styttuna úr bronsi árið 1913 og hefur hún verið vinsæll áfangastaður ferðamanna allar götur síðan.

Frumkvæðið að verkinu hafði Daninn Carl Jacobsen, sem hafði orðið hugfanginn af ballett um ævintýrið sem sýndur var í konunglega danska leikhúsinu. Ævintýrið um litlu hafmeyjuna var fyrst gefið út árið 1837.

Jyllands Posten

TV2Kosmopol

Telegraph