Stelpurnar Norðurlandameistarar og strákarnir fengu silfur

Stelpuliðið var gríðarlega öflugt og vann Norðurlandameistaratitilinn með sannfærandi hætti. Liðið vann alla fjóra leiki sína þar af úrslitaleikinn á móti Finnum með 21 stigi, 70-49. Liðið hafði áður unnið 22 stiga sigur á Finnum, 17 stiga sigur á Þjóðverjum og 32 stiga sigur á Dönum.

Berglind Katla Hlynsdóttir (Stjarnan) var stigahæst hjá íslenska liðinu í úrslitaleiknum með 19 stig en hún stal líka fimm boltum. Eva Ingibjörg Óladóttir (Stjarnan) skoraði 16 stig og Rún Sveinbjörnsdóttir (Valur) var með 9 stig, 7 stolna og 6 fráköst.

Berglind var langstigahæst af öllum leikmönnum mótsins með 20,5 stig í leik en Eva skoraði 15,9 stig í leik. Íslenska liðið var 23 og yfir í plús og mínus í öllum fjórum leikjunum á meðan Berglind var inn á vellinum.

Rún Sveinbjörnsdóttir skoraði 7,5 stig í leik og Björk Karlsdóttir (Keflavík) var með 5,8 stig í leik. Björk var frákastahæst í íslenska liðinu með 6,3 fráköst í leik.

Hákon Hjartarson þjálfar íslensku stelpurnar og aðstoðarþjálfarar hans eru Eygló Alexandersdóttir og Bruno Richotti.

Strákaliðið var líka nálægt gullinu en liðið tapaði á móti Þjóðverjum í framlengdum úrslitaleik, 75-82. Íslenska liðið gerði frábærlega með því að vinna upp mun Þjóðverja úr fyrri hálfleiknum en gáfu síðan eftir í framlengingunni og urðu að sætta sig við silfur.

Þjóðverjar voru 48-28 yfir í hálfleik en íslenska liðið vann seinni hálfleikinn 45-25. Framlengingin fór síðan 9-2 fyrir Þjóðverja.

Sindri Logason (Haukar) var stigahæstur í íslenska liðinu í úrslitaleiknum með 15 stig en þeir Baltasar Torfi Hlynsson (Stjarnan) og Marinó Freyr Ómarsson (Stjarnan) skoruðu báðir 13 stig. Atli Freyr Haraldsson (Valur) skoraði 7 stig hann tók 22 fráköst í leiknum þar af átta í sókn.

Íslenska liðið vann Finna og Dana fyrr í keppninni en tapaði báðum leikjum sínum á móti sterku þýsku liði.

Atli Freyr Haraldsson var stighæstur í íslenska liðinu á mótinu með 14,5 stig í leik en hann var líka langfrákastahæstur allra í mótinu með 15,0 fráköst í leik. Sindri Logason skoraði 12,5 stig í leik og Baltasar Torfi Hlynsson var með 9,5 stig í leik.

Dino Stipcic þjálfar strákana og aðstoðaþjálfarar eru Ögmundur Árni Sveinsson og Aron Páll Hauksson.