Hinn 22 ára Tyler Robinson grunaður um morðið á Kirk

„Við náðum honum,“ sagði Cox við upphaf blaðamannafundarins sem hófst rúmri klukkustund seinna en hann hafði verið boðaður.

Í gærkvöldi hafi fjölskyldumeðlimur Tyler Robinson haft samband við fjölskylduvin sem hafi síðan haft samband við lögregluna og upplýst um aðkomu hans að málinu. Robinson hafi játað gjörðir sína fyrir fjölskyldumeðlim, sem áður hefur komið fram í fréttum að hafi verið faðir hans. Gögn málsins, svo sem myndbönd af vettvangi, bíll Robinson og fötin sem hann klæddist styðji við þann grun að Robinson hafi verið sá sem varð Kirk að bana.

„Hey fasisti, gríptu!“

Hann hafi að undanförnu þróað með sér öfgafyllri pólitískar skoðanir og hafi meðal annars lýst andúð sinni á Charlie Kirk við matarborðið nýlega þar sem hann hafi sagt málflutning Kirk vera hatursfullan.

Þá fundust áletruð byssukúluhylki við rannsókn málsins þar sem meðal annars standi „hey fasisti, gríptu!“ og „o bella ciao, bella ciao,“ og „ef þú lest þetta þá ertu samkynhneigður“.

Trump vill sjá dauðarefsingu

Charlie Kirk, sem var 31 árs gamall og tveggja barna faðir, var skotinn til bana á viðburði þar sem hann rökræddi við háskólanema í Utah í fyrradag. Morðingi hans hafði síðan gengið laus þar til hann var handtekinn snemma í morgun, um klukkan ellefu í gærkvöldi að staðartíma í Utha.

Donald Trump Bandaríkjaforseti greindi fyrst frá því að hinn grunaði væri í haldi í viðtali við Fox News sjónvarpsstöðina fyrr í dag. Þá virtist forsetinn ekki hafa mjög nákvæmar upplýsingar um hinn grunaða, en fram kom í máli forsetans í viðtalinu að faðir hans hafi hjálpað til við að koma honum í hendur lögregluyfirvalda. Sjálfur voni Trump að morðingi Kirks, sem var náinn bandamaður forsetans, verði dæmdur til dauðarefsingar fyrir verknaðinn.

Hafði lýst áformunum „í gríni“ í skilaboðum

Cox lýsti því einnig hvernig skilaboð sem gengið hafi á milli Tyler og herbergisfélaga hans bendi til þess að árásin hafi verið skipulögð. Rannsakendur hafi yfirheyrt herbergisfélagann sem hafi sagt að hann hafi „grínast“ með planið á samskiptamiðlinum Discord.

Hann hafi sýnt lögreglu skilaboðin þar sem Tyler hafi lýst því að það þurfi að munda riffil úr skotfæri og skilja hann eftir í runna. Lýsingin í skilaboðunum hafi verið nokkuð ýtarleg varðandi það hvar og hvernig ætti að skilja riffilinn eftir, vafinn inn í handklæði.

Fréttin hefur verið uppfærð.