Nokkur fjöl­býlis­hús í ljósum logum

Þrír íbúar og einn slökkviliðsmaður hafa látið lífið í eldhafinu, samkvæmt miðlinum South China Morning Post. Að minnsta kosti þrír slökkviliðsmenn eru slasaðir og eldri maður hefur sagt að eiginkona hans hafi verið föst í íbúð þeirra.

SCMP hefur eftir lögreglu að nokkrar tilkynningar hafi borist um fólk sem sé fast í húsunum. Ekki er vitað hve margir urðu innlyksa í húsunum.

Í heildina standa átta fjölbýlishús þarna á svæðinu. Í þeim húsum eru nærri því tvö þúsund íbúðir og þarna bjuggu nærri því fimm þúsund manns, árið 2021, samkvæmt frétt BBC.

Hér að neðan má sjá beina útsendingu Reuters frá Hong Kong.

Hringdu eftir hjálp

Lögreglan sagði fyrr í morgun, að þremur klukkustundum eftir að eldarnir kviknuðu hefðu enn verið að berast símtaöl frá fólki sem sat fast inn í húsunum. Einn þeirra var fastur á þaki eins hússins.

SCMP hefur eftir embættismanni í Hong Kong að talið sé að að minnsta kosti þrettán séu fastir inni í húsunum. 

Eldurinn var fyrst settur í fyrsta flokk en fljótt færður upp í þann fjórða. Síðar var hann svo settur í fimmta flokk, sem er hæsti flokkur elda í Hong Kong. Flokkarnir fara eftir því hversu alvarlegir eldarnir eru.

Þetta er fyrsti fimmta flokks eldurinn í Hong Kong í sautján ár.

Stillasar úr bambus eru algengir þar sem framkvæmdir eiga sér stað í Hong Kong. Yfirvöld þar tilkynntu fyrr á þessu ári að til stæði að reyna að fækka þeim á opinberum vinnustöðum, til að auka öryggi.

83 ára maður sem bjó í einu húsinu sagði við blaðamenn að brunabjöllur hefðu ekki farið í gang þegar eldarnir kviknuðu. Þess vegna hafi fólk verið lengi að átta sig á hættunni.

Aðrir íbúar hafa slegið á svipaða strengi.

Embættismaður sem talað var við hafði eftir íbúum sem flúðu að þeir hefðu áttað sig á stöðunni þegar þeir fundu brunalykt og þegar öryggisvörður barði á dyrnar hjá þeim. Þá var eldurinn orðinn töluvert útbreiddur og þau hafi haft lítinn tíma til að flýja.

Fréttin hefur verið og verður uppfærð.