Segir ís­lensk fé­lög búin að eyða meira en milljarði í er­lenda leik­menn í vetur

Grímur Atlason hefur starfað í einn og hálfan áratug í stjórnum körfuboltadeilda og þekkir því hvaða kostnaður fylgir því að fá erlendan leikmann í sitt lið en hann hefur verið í körfuknattleiksdeild Vals og styður sitt mál væntanlega með þekkingu í rekstur þeirrar körfuknattleiksdeildar.

Grímur hefur áður varað við þeirri þróun hjá íslenskum körfuboltafélögum að eyða gríðarlegum upphæðum í erlenda atvinnumenn í deild sem á að vera áhugamannadeild en er langt frá því að vera það.

„Stefnulaus körfubolti – botnlaust bruðl“

Nú er búið að loka félagsskiptaglugganum í Bónus-deildum karla og kvenna en hingað til í vetur hafa erlendir leikmenn komið, farið og jafnvel farið í önnur íslensk félög.

Grímur hefur tekið saman athyglisverða tölfræði um komu og kostnaðinn við að fá alla þessa erlendu leikmenn til þeirra félaga sem eiga lið í efstu deild í íslenskum körfubolta. Hann setti þessa samantekt sína inn á samfélagsmiðla undir fyrirsögninni „Stefnulaus körfubolti – botnlaust bruðl.“ Vert er að taka fram að ekkert er staðfest í þessum tölum nema tölur um félagaskiptagjald.

109 erlendir leikmenn í vetur

„Á yfirstandandi keppnistímabili hefur 71 erlendur leikmaður verið skráður til leiks í úrvalsdeild karla. Af þeim eru 48 hér enn. Kvennamegin hafa 38 erlendir leikmenn verið skráðir til leiks á þessu tímabili. Af þeim eru 30 hér enn,“ skrifaði Grímur.

Samkvæmt hans útreikningum þá hafa íslensk félög eytt í kringum 1,2 milljörðum króna í erlenda leikmenn á leiktíðinni. Bara KKÍ hefur fengið inn tæpar 33 milljónir króna í félagsskiptagjöld.

„Það skal tekið fram að þetta er áætlun byggð á þekkingu minni af rekstri körfuknattleiksdeildar í 15 ár. Hugsanlega náðu einhver þessara liða frábærum samningum við einhverja leikmenn. Eftir þessi útgjöld eiga félögin eftir að borga laun íslenskra leikmanna, þjálfara, sjúkraþjálfara, styrktarþjálfara, dómara, leigu á íþróttahúsum, greiða fyrir auglýsingar, sektir, ferðalög, búninga og margt fleira,“ skrifaði Grímur.

Ungmennafélög með almannaheillaskráningu

„Það er eitthvað verulega bogið við það að 13 ungmennafélög með almannaheillaskráningu telji það eðlilegasta hlut í heimi að borga rúmlega 1,2 ma.kr. vegna erlends vinnuafls í keppni þar sem verðlaunaféð er ein milljón króna frá Bónus og 500 þúsund frá VÍS ef þú skyldir vinna bikarinn,“ skrifaði Grímur.

„Ef það er sett í samhengi, má setja það í miðasölusamhengi. Gefum okkur að hvert lið úr úrvalsdeild karla keppi 16 heimaleiki (meðaltal) á tímabili. Þurfa þau þá að selja miða fyrir 4,6 m.kr. á hverjum leik bara til að borga kostnað við erlenda leikmenn. Það þýðir að selja þarf 1533 miða á 3.000 kr. hvern leik. Kvennamegin má gera ráð fyrir 16 leikjum og þar þarf að selja miða fyrir 2,2 m.kr. Það næst með því að selja 733 miða á hvern leik. Þegar farið er yfir skráningar áhorfenda á leiki má sjá að seldir miðar eru nær 50-200 á hverjum leik. Og þá á eftir að borga allt hitt…,“ skrifaði Grímur.

Hér fyrir neðan má sjá pistilinn og nánari útlistun á kostnaðinum.

Fréttin hefur verið uppfærð.