Banda­ríkja­menn vilji að stríðinu verði lokið í júní

Í frétt Guardian er haft eftir Selenskíj að ríkisstjórn Donalds Trumps „muni líklega þrýsta“ á Úkraínu og Rússland að binda enda á stríðið fyrir byrjun sumars.

„Þeir segja að þeir vilji klára allt fyrir júní,“ sagði Selenskíj við fréttamenn.

„Þeir munu gera allt til að binda enda á stríðið og þeir vilja skýra tímaáætlun yfir alla atburði.“

Í þessari viku fóru síðan fram tveggja daga friðarviðræður undir forystu Bandaríkjanna í Abu Dhabi án nokkurrar niðurstöðu. Haft var þó eftir Kyrylo Búdanov, yfirmanni forsetaskrifstofu Úkraínu, að samningaviðræðurnar hefðu verið „raunverulega uppbyggilegar“.

Viðræðunum í Abu Dhabu lauk í gær en Selenskíj sagði við blaðamenn að enn ætti eftir að leysa úr erfiðum málum. Það hefði þó verið rætt í fyrsta sinn að halda þríhliðafund í Bandaríkjunum og að mati Bandaríkjamanna eigi það að vera markmið að ljúka þeim fyrir júní, og stríðinu sömuleiðis. 

Hann bætti við: „Ef Rússar eru raunverulega tilbúnir að binda enda á stríðið, þá er virkilega mikilvægt að setja einhvern eindaga.“

Selensíkj sagði eftir viðræðurnar að Bandaríkjamenn hefðu lagt til að næsta umferð þríhliða viðræðna Rússa, Úkraínumanna og Bandaríkjamanna færu fram í Miami eftir viku. Hann sagði Úkraínu hafa staðfest þátttöku

Í frétt Guardian er það rifjað upp að áður en Donald Trump tók við embætti lofaði hann að „binda enda á stríðið á 24 klukkustundum“. Síðar stakk sérstakur sendifulltrúi hans fyrir Úkraínu, Keith Kellogg, upp á því að báðir aðilar gætu náð samkomulagi innan 100 daga frá embættistöku Trumps. Eftir að það tókst ekki heldur setti Trump nýtt markmið um að binda enda á stríðið í ágúst í fyrra og í desember sagði hann svo að drög að samkomulagi um að binda enda á stríðið væru næstum „95 prósent tilbúin“.