Dag­skráin í dag: Nær United þeim fimmta í röð og fær hárið að fjúka?

Veislan í dag hefst klukkan rúmlega sex á Sýn Sport Ísland þar sem sýnt verður beint frá viðureign Stjörnunnar og Hauka í Bónus deild kvenna. 

Rúmlega klukkustund síðar hefst bein útsending frá viðureign KR og nýkrýndra bikarmeistara Keflavíkur í sömu deild. Sá leikur verður sýndur á Sýn Sport Ísland 2. 

Áður en við snúum okkur að enska boltanum er vert að minnast á beina útsendingu frá leik lærisveina Guðjóns Vals Sigurðssonar í Gummersbach á móti Flensburg. Bæði lið er í baráttunni í efri hluta deildarinnar, Flensburg í öðru sæti en Gummersbach í því sjötta. Leikurinn hefst klukkan sjö og verður sýndur á Sýn Sport Viaplay. 

Þá eru athyglisverðir leikir á dagskrá ensku úrvalsdeildarinnar í fótbolta. Þrír leikir hefjast klukkan hálf átta. 

Á Sýn Sport tvö mætast Chelsea og Leeds United. Chelsea verið á miklu skriði í deildinni upp á síðkastið og er í 5.sæti á meðan að Leeds United vann frábæran sigur í síðustu umferð og færist fjær fallsvæðinu. 

Á Sýn Sport 3 tekur Everton á móti Bournemouth og á Sýn Sport 4 taka lánlausir Tottenham menn á móti Newcastle United en bæði lið hafa verið í brasi upp á síðkastið. 

Klukkan korter yfir átta á Sýn Sport hefst síðan leikur West Ham United og Manchester United. Þar geta Rauðu djöflarnir unnið sinn fimmta sigur í röð í deildinni, mikið undir fyrir einn ákveðinn stuðningsmann liðsins sem hefur ekki farið í klippingu síðan í október árið 2024 og ætlar ekki að fara í klippingu fyrr en liðið vinnur fimm leiki í röð í deildinni. 

Að þessum leikjum loknum taka þriðjudagsmörkin við þar sem öll mörk kvöldsins verða sýnd. 

Þá endar kvöldið á Sýn Sport á lokaþætti Lokasóknarinnar þetta tímabilið í NFL deildinni þar sem meðal annars leikurinn um Ofurskálina verður gerður upp.