Berg­lind Katla með stór­leik og Stjörnukonur byrja á sigri

Stjörnukonur unnu leikinn á endanum með fimm stigum, 84-79, og minnkuðu forskot Keflavíkur á toppnum í tvö stig. Hamar/Þór er nú tólf stigum á eftir Stjörnunni.

Berglind Katla skoraði 24 stig í leiknum en var auk þess með fimm fráköst, þrjár stoðsendingar og þrjá stolna bolta. Stina Almqvist var einnig mjög óflug með 23 stig og 12 fráköst og fyrirliðinn Eva Wium Elíasdóttir bætti við átján stigum og sex stoðsendingum. Ruth Helena Sherrill skoraði 10 stig og tók 14 fráköst og Diljá Ögn Lárusdóttir var með sjö stig.

Jadakiss Nashi Guinn skoraði 26 stig fyrir Hamar/Þór og Jovana Markovic var með 17 stig og 10 fráköst. Ana Clara Paz skoraði 13 stig og Mariana Duran var með 10 stig og 7 stoðsendingar. Bergdís Anna Magnúsdóttir var atkvæðamest íslensku stelpnanna með átta stig.

Hamar/Þór vann KR sannfærandi í leiknum á undan sem var fyrsti leikur liðsins undir stjórn Hallgríms Brynjólfssonar.

Leikurinn í kvöld var jafn og spennandi nær allan tímann en það var jafnt í hálfleik, 42-42.

Hamars/Þórs konur byrjuðu seinni hálfleikinn mjög vel og komust mest átta stigum yfir en Garðabæjarliðið náði að snúa því við og komast einu stigi yfir, 66-65, fyrir lokaleikhlutann.

Stjarnan var skrefinu á undan nær allan leikhlutann en gestirnir af Suðurlandinu gáfust aldrei upp. Liðið setti niður stór skot á lokakaflanum en tókst ekki að brúa bilið þar sem meðal annars Berglind Katla nýtti vítin sín vel í lokin.