Hafnaboltinn kallar á NFL-leikstjórnandann

Murray var frambærilegur spilari í bæði amerískum fótbolta og hafnabolta í háskóla og Oakland A‘s völdu hann níunda í nýliðavali MLB-deildarinnar árið 2018. Murray skrifaði undir samning og hugðist hefja æfingar með liðinu vorið 2019.

Í kjölfarið átti hann aftur á móti stórkostlegt ár í ameríska fótboltanum og hlaut Heisman-verðlaunin, sem besti háskólaleikmaður ársins, tímabilið 2018 og ákvað í kjölfarið að skrá sig í nýliðaval NFL-deildarinnar.

Þar var hann valinn fyrstur af Cardinals og tók í kjölfarið ákvörðun um að ljúka hafnaboltaferlinum og slíta samningi við Oakland. Murray hefur leikið með Cardinals undanfarin sjö ár en hlutverk hans farið minnkandi síðustu misseri.

Oakland A‘s eiga enn réttinn að hinum 28 ára gamla Murray ákveði hann að feta nýjan veg og skipta aftur í hafnaboltann. Þar standa honum opnar dyr.

„Kyler er leikstjórnandi í efsta klassa, og ég er viss um að hann eigi úr mörgum tilboðum að velja til að halda fótboltaferlinum áfram,“ segir David Forst, framkvæmdastjóri Oaklands, í samtali við MLB.com.

„Hafandi sagt það, þá veit hann að við erum alltaf til í að skoða endurkomu hans í hafnaboltann með A‘s, vilji hann það á einhverjum tímapunkti.“

Ekkert hefur bent til þess að Murray hyggist breyta til. Minnesota Vikings, Miami Dolphins, New York Jets og Atlanta Falcons eru sögð meðal NFL-liða sem líta hýru auga til kappans.