Boða lækkanir í Bónus og Hag­kaupum með nýju sam­starfi

Þar segir að með samstarfinu fái verslanir Bónus og Hagkaups meðal annars aðgang að breiðu vöruúrvali Salling Group, félagið reki yfir 2.100 verslanir í Danmörku, Þýskalandi, Póllandi og Eystrasaltslöndunum. Á heimamarkaði Salling í Danmörku reki félagið þekktar verslunarkeðjur, svo sem Netto, føtex og Bilka, auk þess að reka Netto víðar í Evrópu og Rimi í Eystrasaltslöndunum.

„Fyrstu vörurnar eru nú þegar komnar í hillur hjá Bónus og Hagkaup, en úrvalið mun stækka ört á næstu mánuðum og verða fleiri en þúsund vörunúmer í boði innan nokkurra mánaða. Vörurnar sem um ræðir eru meðal annars undir merkjum á borð við Salling, ØKO, FRI, Princip og Budget - vörulínur sem eru þekktar fyrir gott verð, fjölbreytt úrval, og mikil gæði,“ segir meðal annars í tilkynningunni.

Þar segir ennfremur að fjöldinn allur af vörum Salling beri viðurkenndar gæðavottanir og næringarmerkingar sem þekkjast vel á Norðurlöndunum, svo sem Lykillinn, Ø-merkið fyrir lífræna vottun og norræna umhverfismerkið Svanurinn. Samstarfið veiti verslunum Haga undir merkjum Bónus, Hagkaups og Olís, aðgang að nýju og fjölbreyttu úrvali af vörum sem hafi notið mikillar vinsælda í nágrannalöndum og bætir innkaupsverð félagsins í fjölda vöruflokka. Markmið Haga sé að nýta þennan ávinning til að bjóða enn betri verð í verslunum félagsins, sem og að auka vöruúrval og gæði.

„Það hefur ávallt verið keppikefli okkar að ná árangri í innkaupum og tryggja þannig viðskiptavinum sem allra best vöruverð. Samstarf okkar við Salling er stærsta skref sem við höfum stigið á þessu sviði í áratugi og markar þáttaskil í matvöruverslun á Íslandi. Salling hefur ákveðna yfirburði á danska markaðnum, hvað varðar stærð, innkaupagetu og fjölbreytni vörulína, en samstarfið veitir okkur aðgang að fjölbreyttu vöruúrvali sem þekkist víða í Evrópu. Fyrir neytendur á Íslandi þýðir þetta annars vegar lægra verð á hundruðum vara og hins vegar aukið úrval af vörum af miklum gæðum. Við erum stolt af því að geta lagt okkar enn frekar af mörkum í baráttunni við verðbólguna, sem hefur sjaldan verið mikilvægara en nú,“ segir Finnur Oddsson, forstjóri Haga.

„Við erum afar ánægð með samstarfið við Haga og sjáum í því mikil tækifæri. Hagar eru, líkt og Salling Group, leiðandi fyrirtæki á sínum markaði og leggja ríka áherslu á að bjóða viðskiptavinum sínum fjölbreytt vöruúrval og samkeppnishæf verð. Ég vil þakka Högum það traust sem þau sýna okkur og legg áherslu á að við munum gera allt sem í okkar valdi stendur til að standa undir því, til hagsbóta fyrir neytendur á Íslandi,“ segir Anders Hagh, forstjóri Salling Group.