Keflavík í úrslitin

Fjórði leikur ÍR og Keflavíkur í undanúrslitum Úrlvalsdeildarinnar í körfubolta í gær var ekki sérlega spennandi, þar sem Keflvíkingar léku á alls oddi og unnu sannfærandi sigur í Seljaskóla, 97-72. ÍR-ingar náðu sér aldrei a strik í leiknum og skoruðu aðeins 24 stig í fyrri hálfleik, þar sem Keflvíkingar hreinlega kafsigldu þá með stífri pressuvörn og ekki laust við að úrslit leiksins hafi verið að mestu ráðin í hálfleik. Í síðari hálfleik var mikill hiti leikmönnum og hart barist, en í síðasta leikfjórðungnum leyfðu þjálfararnir varamönnum sínum að ljúka leiknum, því úrslit hans voru þá löngu ráðin. Eiríkur Önundarson, fyrirliði ÍR var að vonum daufur í dálkinn eftir leikinn. "Ég vil nú bara byrja á því að biðja alla þessa áhorfendur sem komu hérna að styðja okkur afsökunar á slakri frammistöðu okkar í dag. Við bara stífnuðum allir upp og það var eins og okkur skorti kjark til að klára þetta. Þeir spiluðu auðvitað fína vörn, en við vorum bara lamdir utan undir og tókum því ekki. Keflvíkingar eru með hörku lið og mikla reynslu, en mér finnst fyrst og fremst ömurlegt að spila ekki betur fyrir alla sem komu að styðja okkur í kvöld." Gunnar Einarsson, fyrirliði Keflvíkinga var brattur í leikslok og ánægður með sína menn. "Við skelltum hreinlega í lás á þá í öðrum leikhlutanum og þeir voru í vandræðum með að koma boltanum í leik. Ég hélt að þetta væri komið gott þegar við vorum komnir með sex stopp á þá í röð, en þetta hélt bara áfram og þá kom auðvitað sóknarleikurinn í kjölfarið,", sagði Gunnar, sem hrósaði ÍR-ingum fyrir góða frammistöðu og er bjartsýnn á að mæta Snæfellingum í úrslitunum. "Nú er bara að fara heim til Keflavíkur og taka Snæfell, hvort sem það verður 3-0 eða eitthvað annað, " sagði fyrirliðinn.