Færri þristar hjá Keflavík

Keflvíkingar hafa unnið 6 af 8 leikjum sínum í úrslitakeppni Intersportdeildar karla í körfubolta og stefna ótrauðir á það að tryggja sér íslandsmeistaratitilinn þriðja árið í röð og í fimmta sinn á síðustu átta árum. Keflavík vann fyrsta leikinn gegn Snæfelli með 15 stigum og vantar nú tvo til viðbótar til að verja titilinn annað árið í röð. Keflvíkingar hafa gegnum tíðina lagt mikið upp úr þriggja stiga skotum en nú má segja að öldin sé önnur. Í dag er það hin grimma pressuvörn og góð hraðaupphlaup í kjölfarið sem er helsti höfuðverkur andstæðinganna í stað skotsýninga utan af velli sem felldu mörg liðin á árum áður. Keflavíkurliðið hefur sem dæmi "aðeins" skorað 5,4 þriggja stiga körfur að meðaltali í leik í úrslitakeppninni í ár en það hefur þó ekki komið í veg fyrir að liðið hefur skorað rétt tæp 90 stig að meðaltali í leik. Í fyrsta leiknum gegn Snæfelli skoraði Keflavíkurliðið 37 stig úr hraðaupphlaupum á móti 3 stigum úr þriggja stiga skotum í uppsettum sóknum. Magnús Þór Gunnarsson skoraði allar fimm þriggja stiga körfur liðsins í leiknum þar af fjórar þeirra í hraðaupphlaupum. Skotnýtingin er líka mun slakari en þegar Keflavík hefur orðið Íslandsmeistari á síðustu átta árum. Keflavík nýtti þannig yfir 40% þriggja stiga skota sinna 1997 (40,3%), 1999 (41,6%) og 2003 (44,3%) en nýtingin datt niður í 38,5% í fyrra og er aðeins 24,0% það sem af er í þessari úrslitakeppni. Snæfellingar mega þó ekki sofna á verðinum þegar liðin mætast í Hólminum í dag því að Keflvíkingar hafa nýtt þriggja stiga skotin mun betur á útivelli (30% á móti 20% á Sunnubrautinni) og þar af hefur Magnús Þór Gunnarsson nýtt 12 af 23 þriggja stiga skotum sínum á útivelli í úrslitakeppninni í ár sem er 52% nýting.