Heimsmarkaðsverð á hrásykri hækkaði um þrjú prósent í dag og endaði í 22 sentum pundið, eða um 61 króna kílóið. Sykurverð hefur ekki verið hærra síðan 1981.
Þessi mikla hækkun á rætur sínar að rekja til vaxandi áhyggna af framboðsbresti, að því er fram kemur á fréttavef breska ríkisútvarpsins.
Haft er eftir sérfræðingum í sykurbransanum að þessar áhyggjur séu einkum til komnar vegna aukinnar eftirspurnar eftir sykri til eldsneytisframleiðslu í Brasilíu. Þá hafi einnig orðið heilmikill brestur á sykuruppskeru á Indlandi, sem búist er við að muni versna.
Sykursérfræðingur hjá bandaríska fyrirtækinu Newedge telur sykurverð áfram munu hækka.
Sykurverð ekki hærra í 28 ár
