Óttinn er kominn aftur, rautt í öllum kauphöllum

Bill Gross líkir stöðunni nú við upphaf undirmálslána-kreppunnar. Í viðtali við CNBC stöðina segir hann að umfang óttans meðal fjárfesta sé að vísu ekki jafnmikið og í kjölfar undirmálslána-kreppunnar en hægt sé að finna sameiginlega punkta í stöðunni nú og þá.

Bill Gross er stofnandi Pimco, eins stærsta fjárfestingarsjóðs heimsins og hann er forstjóri Total Return sem er stærsti skuldabréfasjóður heimsins.

Það sem liggur að baki óttans nú að mati Gross er annarsvegar slæmar tölur frá bandaríska vinnumarkaðinum og hinsvegar vaxandi áhyggjur af skuldastöðu ríkjanna í Suður-Evrópu.

„Alþjóðamarkaðir hafa á síðasta ári verið keyrðir áfram af lánapólitík ríkisstjórna og seðlabanka. Nú erum við byrjaðir að setja spurningamerki við markaðsverðmæti þeirra hlutabréfa sem hafa hækkað á grunni þessarar stefnu," segir Gross.

Gross bendir á að eftir að undirmálslána-kreppan hófst hélst verðmæti hlutabréfa hátt langt fram á árið 2008 þegar svo allt hrundi þá um haustið. Hugsanlega sé hið sama að gerast að nýju. Allavega bendir Gross á að vogunarsjóðir séu í auknum mæli hættir að endurlána fé sem þeir hafa sjálfir tekið að láni á lágum vöxtum.