Umfjöllun, viðtöl, einkunnir og myndir: Víkingur - Keflavík 7-1 | Víkingar rústuðu botnliðinu

Víkingar gáfu út sterk skilaboð í kvöld að fallbarátta væri ekki eitthvað sem strákarnir í Víkinni ætluðu sér að standa í. Þeir tóku sig til og völtuðu yfir Keflvíkinga 7-1 og það er erfitt að sjá hvernig Keflavík ætlar að bjarga sér frá falli í ár. Það var frábær seinni hálfleikur og innkoma nýja mannsins, Vladimir Tufegdzic, sem gerði útslagið hér í kvöld. Á röskum hálftíma kom hann að öllum mörkum Víkinga í seinni hálfleik.

Andri Marinó Karlsson, ljósmyndari Fréttablaðsins og Vísis, var á vellinum og tók myndirnar sem fylgja fréttinni.

Keflvíkingar komu þó sterkir til leiks og byrjuðu leikinn af krafti. Þeir voru óheppnir að komast ekki yfir eftir 2-3 langskot en Thomas Nielsen varði meistaralega í öll skiptin. Chuckwudu Chijindu, framherjinn sterki, byrjaði sinn fyrsta leik en náði ekki að setja mark sitt á leikinn. Það kom á daginn að sóknarleikur Keflvíkinga einskorðaðist við þessi langskot og því komst Chuck aldrei í samband við liðsfélaga sína.

Víkingum óx ásmeginn eftir um það bil korter af fyrri hálfleik og þar var Aukaspyrnu-Ívar að verki. Hann spilaði í nýju hlutverki á miðjunni, stoppaði sóknir Keflvíkinga og var duglegur að koma með hættulega bolta fram á við. Líkt og flest mörk Víkinga í kvöld kom fyrsta markið af kantinum en bakverðir Keflavíkur voru í miklum vandræðum. Dofri Snorrason þræddi boltann á Hallgrím Mar á kantinum sem átti ekki í vandræðum með að leggja boltann í netið.

Víkingar voru að spila vel og fóru með verðskuldaða forystu, 2-0, í seinni hálfleik eftir að Unnar Már Unnarsson setti boltann í eigið net eftir fyrirgjöf Davíð Arnar Atlasonar.

Líkt og í fyrri hálfleik hófu Keflavíkurmenn seinni hálfleik af krafti en aftur entist það ekki nema í svona korter. Vladimir Tufegdzic kom inn á 58. mínútu og hálftíma seinna var staðan orðin 7-1. Nýji maðurinn kom að öllum mörkum Víkinga í seinni hálfleik og öll komu þau eftir skyndisóknir.

Vörn Keflavíkur var mjög framarlega og það var einfaldlega ekkert mál fyrir Víkinga að skora mörk í seinni hálfleik. Þeir leyfðu Keflvíkingum að vera með boltann og refsuðu þeim grimmt nánast í hvert skipti sem þeir misstu boltann. Aftur og aftur komust Víkingar í yfirtölu gegn varnarmönnum Keflavíkur og það skilaði marki eftir marki eftir marki.

Rolf Toft var arkitektinn að þriðja marki Víkinga þegar Tufegdzic opnaði markareikning sinn. Snyrtilega gert hjá honum þar sem hann tiplaði fram hjá varnarmönnum Keflavíkur áður en hann lagði boltann í markið. Eftir það fór Tufegdzic bara að gefa og áður en leikurinn var úti var hann búinn að leggja upp fjögur mörk, 1 fyrir Rolf Toft, 1 fyrir Hallgrím og 2 fyrir Agnar Darra sem átti öfluga innkomu í seinni hálfleik.

Víkingar náðu því í langþráðan sigur og eftir brottrekstur Ólafar Þórðarsonar í síðustu viku hljóta menn að vera ánægðir með að ná að stimpla umræðuna sem kom í kjölfarið algjörlega út á hafsauga.

Keflvíkingar eiga virkilega erfitt verkefni fyrir höndum að halda sér uppi og það er erfitt að sjá hvernig hinir óreyndu þjálfarar, Haukur Ingi og Jóhann Birnir, ætla að rífa þetta upp. Það stendur ekki steinn yfir steini, bæði varnarlega og sóknarlega og 1. deildin blasir við nema eitthvað ótrúlegt gerist.

Milos: Fjarvera Taskovic ekki í lagi ef við værum á Bretlandi

Milos Milojevic, þjálfari Víkingar var kátur með sína menn: „Við vitum alltaf hvernig andstæðingurinn ætlar að spila en í kvöld voru allir að fara eftir því sem við töluðum fyrir leik og það sem við vorum að æfa í vikunni. Menn börðust fyrir hvern annan og við spiluðum á okkar forsendum og þegar við gerum það getum við sigrað öll lið í deildinni.“

„Við spiluðum mjög vel. Keflvíkingar áttu kafla góðan leik en þá stöndum við vaktina og markmaður okkar skilar sinni vinnu.“

„Ég er mjög ánægður með strákana. Frá þeim fyrsta til síðasta, allir sem koma inn á skila sinni vinnu. Ef ég gæti einhverju breytt þá myndi ég vilja vinna þennan leik 1-0 og dreifa hinum mörkunum á næstu leiki.“

Igor Taskovic var ekki í hóp en ástæður þess voru persónulegar að sögn Milos: „Ég get ekki farið djúpt í það nema sagt að það eru persónulegur ástæður, svokölluð „Private-problems“ Hann kemur í næstu viku og þarf að koma sterkur inn í undirbúninginn gegn Val og bæta fyrir það sem hann er búinn að missa af síðustu 4-5 daga.“

Milos hefði þó gjarnan vilja hafa haft hann hjá sér enda er hann mikilvægur liðinu: „Ef við værum í Bretlandi þá er þetta líklega ekki í lagi en við erum á Íslandi þar sem eru fáir atvinnumenn. Hann á í vandræðum heima fyrir og það gengur fyrir, þegar eitthvað svoleiðs gerist eigum við að sýna samhug.

Að sjálfsögðu vildi ég þó hafa hann í öllum leikjum og í öllum leikjum. Hann er fyrirliðið og þarf að standa í þessu með strákunum.“

Innkoma Vladimir Tufegdzic var hreint út sagt ótrúleg en hann skoraði mark og átti þátt í öllum hinum mörkunum í seinni hálfleik. Milos var þó varfærinn í að hrósa sínum manni: „Þessi leikur var spilaður frá A-Ö eins og við lögðum hann upp. Hann kom vel inn í þá stöðu sem hann var beðinn um að spila og skilaði frábærri vinnu. Ég vil þó aldrei taka einn út og hrósa honum. Liðsheildin skilaði okkur þremur stigum.“

Haukur Ingi: Ekki boðlegt frá A-Ö

„Við gefum þeim mörkin í fyrri hálfleik með kæruleysislegum sendingum og lélegum varnarleik,“ sagði Haukur Ingi Guðnason, annar þjálfara Keflavíkur, eftir 7-1 stórtapið fyrir Víkingi í kvöld.

„Við erum 2-0 undir í hálfleik og komum ágætlega inn í seinni hálfleik, förum vel yfir hlutina í hálfleik. Mér leið vel á bekknum til þess að byrja með en svo gefumst við bara upp. Þetta er ekki boðlegt frá A-Ö.

Chuckwudi Chijindu og Farid Zato spiluðu sína fyrstu leiki fyrir Keflavík í kvöld en voru daprir líkt og allt Keflavíkurliðið. Haukur Ingi býst þó við að Chuck komi sterkur inn:

„Við vitum öll hvað Chuck getur gert þó hann hafi skorað mark í þeim leikjum sem hann spilaði í fyrra. Þá var hann meiddur en núna er hann heill og hann verður betri eftir því sem hann lærir inn á leik liðsins.“

Menn gera ráð fyrir að styrkja liðið enn frekar það sem eftir lifir af glugganum: „Vð munum skoða það vel að bæta við okkur mönnum í glugganum. Bæði í varnarstöður og sóknarstöður enda þörf á því.“