Össur varð fyrir reiði tyrkneskra stuðningsmanna en er tilbúinn að fórna sér

Össur Skarphéðinsson, fyrrverandi utanríkisráðherra og formaður Samfylkingarinnar, blandaði sér nokkuð óvænt inn í heitar umræður tyrkneska stuðningsmanna á Facebook-síðu KSÍ. Stuðningsmennirnir hafa fjölmennt á þráð þar sem miðasala fyrir leik Íslands og Tyrklands var auglýst. 

Reiði stuðningsmannanna má rekja til atviks í Leifsstöð þar sem ónefndur maður þóttist ætla taka viðtal við leikmann tyrkneska landsliðsins með uppþvottabursta. Sjálfur skildi Össur ekki af hverju umræðan snerist um uppþvottabursta en sá marga reiða stuðningsmenn á ferð og ákvað að „testa þetta“.

Sjá einnig: Hatrinu rignir yfir ís­lenska í­þrótta­blaða­menn vegna ó­þekkts þvotta­bursta­manns

„Ég var lengi að skilja af hverju þeir voru allir að vefa uppþvottabursta inn í mál sitt og tengja það við ýmsa líkamsparta íslenskra aðdáenda,“ segir Össur í samtali við Vísi. Hann gerði því heiðarlega tilraun til þess að lægja öldurnar og stríða þeim aðeins í leiðinni þar sem ljóst var að þarna voru stuðningsmenn sem voru æstari en þekkist hér almennt.

„Ég taldi rétt að minna þá á það að Íslendingar og Tyrkir eiga sameiginlega sögu frá því fyrir þúsund árum þegar að Þorsteinn drómundur hefndi vígs bróður síns Grettis sem drepinn var í Drangey fyrir utan hina miklu kirkju Ægisif,“ segir Össur.

Óhultur í útlöndum sem stendur 

Hann segist vera rólegur yfir viðbrögðunum enda er hann sjálfur staddur í útlöndum þessa stundina. Hann hafi ekki miklar áhyggjur enda segir hann enga ástæðu til þess að óttast þessa góðu menn eins og hann orðar það sjálfur.

Aðspurður hvort hann telji reiði stuðningsmannanna langlífa segir hann það ekki ólíklegt ef leikurinn fer eins og hann spáir en sjálfur hefur hann trú á 2-0 sigri Íslands. Hann hefur þó ekki áhyggjur af milliríkjadeilum í kjölfar leiksins.

„Það held ég nú ekki en ég náttúrulega styð mína menn alveg botnlaust og þeir stóðu sig alveg ágætlega í síðasta leik. Tyrkir komu mjög á óvart og voru að vinna Frakka, þá eru þeir auðvitað sannfærðir um það að þeir rúlli upp Íslendingunum en það er akkúrat í slíkri stöðu sem Íslendingarnir hafa svo oft komið á óvart og ég held að það gerist,“ segir Össur, sannfærður um tveggja marka sigur Íslands enda hafi það margsannað sig að Ísland standi sig best undir pressu.

Einn stuðningsmanna Tyrklands svarar Össuri undir færslu KSÍ og segir 78 milljónir Tyrkja bíða eftir honum. Hann segir það ekki vera neitt nýtt enda hafi hann átt áhangendur í Tyrklandi lengi, hann hafi oft komið þangað og alltaf fengið góðar móttökur. Hann hafi því ekki áhyggjur af því að breyting verði þar á en sé tilbúinn ef til þess kemur.

„Enda yrði það glæsilegt, að geta fórnað sér fyrir íslenska landsliðið,“ segir Össur að lokum og tekur undir að hann myndi í það minnsta skrifa sig í sögubækurnar með þeim hætti.